As galegas viaxaron a Murcia para enfrontarse ao Roldán con moitas ganas de seguir coa boa dinámica tras a vitoria do fin de semana pasado ante o Xaloc. Nesta ocasión, as de Manolo Codeso non foron capaces de acadar un resultado positivo ante un sólido Roldán na súa casa e caeron por 4-1.
Manolo Codeso, adestrador do Cidade de As Burgas: “Sabiamos que era unha pista moi difícil e así foi. É verdade que o primeiro tempo foi moi bo pola nosa banda e tivemos varias ocasións de poñernos por diante grazas á boa presión”.
Comezaron avisando as galegas no Gabriel Pérez entre Roldán e Cidade de As Burgas. Ambos equipos gozaron de varias ocasións para poñerse por diante, pero a falta de 11:20 para o tempo de lecer foi o conxunto local o que se adiantou no luminoso. Gol de Crisitina tras unha bonita xogada cunha parede de Mari Ángeles e Marte que empurrou Cristi ao segundo palo a pracer.
Dous minutos despois, as murcianas ampliaban a súa vantaxe e con dous cero chegábase ao descanso. Obra de Bet de potente disparo ao borde da área, despois do saque de falta rexeitada pola defensa.
Manolo Codeso, adestrador do Cidade de As Burgas: “Na segunda parte coa lesión de Nespereira, sumado ás baixas que tiñamos foi moi complicado. Creo que encaixar o 3-1 tan rápido foi a clave do partido”.
Tras a pausa, Manolo Codeso fixo uns axustes e aos tres minutos Clara Fernández recortaba distancias e poñía o 2-1 no marcador. Pouco durou a alegría para as galegas xa que aos 30 segundos, as locais volveron ampliar a vantaxe tras un gol de Bet. A xogadora do conxunto murciano roubou o coiro en campo propio, fixo unha parede con Alba e chegou ao segundo pau para marcar a pracer.
A lesión de Nespereira e as baixas que arrastraba o equipo galego, fixo moi difícil remontar a contenda. E moito máis, cando falta de 10 minutos para o pitido final, Riscos, dun potente disparo desde a frontal da área, poñía 4-1 e sentenciaba o partido. Ana Lastras non puido facer nada ante un auténtico golazo.
Manolo Codeso, adestrador do Cidade de As Burgas: “Marcho contento polo traballo, hai que seguir así. O Roldán é o xusto vencedor e agora todos os partidos que quedan son vitais. Felicitar ao Roldán porque me gustaron moito e fixeron un gran partido”.
FICHA TÉCNICA
ROLDÁN: Etayo; Bet, Marta de los Riscos, Claudia e Mariángeles (cinco inicial). Tamén xogaron, Alba Gandía, Tere, Andrea Marín, Cristina, Mío y Ángela.
CIDADE DE AS BURGAS: Ana López Lastra; Amelia, María Arias, Lucía Nespereira e Clara Fernández (quinteto inicial). Tamén xogaron, Canolich, Nahir, Nati Pacios e María López.
GOLES:
1-0, min. 9 Cristina
2-0, min. 12 Bet
2-1, min. 24 Clara
3-1, min. 24 Bet
4-1, min. 30 Marta de los Riscos
COLEXIADOS: Adrián Pedreño e Sergio Hervás del colexio murciano. Asitente Enrique Sanz. Recibiron cartón amarelo Lucía Nespereira e Amelia no Cidade de As Burgas e Andrea Marín no STV Roldán.
INCIDENCIAS: Pavillón Municipal Gabriel Pérez Sánchez. Uns 350 espectadores.
