Derrota de aprendizaxe para o Cidade de As Burgas

A pesar de caer por 4-0, o Cidade de As Burgas saíu ao partido con moitas baixas, pero sen complexos. Tan só oito xogadoras e moitas delas acumulaban moi poucos minutos na elite. As xogadoras máis novas, como Aroa e María Velle, deron a cara e non acusaron á presión. O partido estivo equilibrado nos seus primeiros compases, cunha Penya Esplugues que buscaba facerse co mango do partido, ante un conxunto ourensán ben plantado a media pista e con gran intensidade nas súas accións defensivas, con boas intervencións baixo paus de Ana López Lastra.

Manolo Codeso, adestrador do Cidade de As Burgas: “Voume contento a pesar da derrota. Sabiamos que era un pista difícil pero non tivemos medo ao partido en ningún momento, arriscamos moito”.

1 de 2

- +

As locais dispoñían de varios achegamentos de perigo de Álex Giró e Marta Colado, mentres as verdes poñían en apuros as locais en xogadas a balón parado. A chegada do 1-0, obra de Laura Oliva desde o punto de penalti, fixo dano as de Codeso. O penalti producíuse por unha man fortuíta de Aroa dentro da área galega, a catro minutos da conclusión da primeira parte.

Manolo Codeso, adestrador do Cidade de As Burgas: “Tiñamos moitas baixas e voume satisfeito co traballo das xogadoras. O partido de hoxe era unha responsabilidade moi grande para xogadoras moi novas e responderon moi ben”.

Nun roubo de balón en primeira liña de presión, as catalás ampliaban a súa renda con gol de Roser a pase de Isa García. As ourensás tentaron envorcarse no tramo final do período, pero sen acerto para recortar distancias antes do descanso. As pupilas de Codeso notaron moito as baixas das xogadoras máis veteráns e, a pesar da derrota, as máis noveles deron a cara e fixeron un bo partido.

Manolo Codeso, adestrador do Cidade de As Burgas: “A pesar das derrotas, temos que valorar o gran traballo que estamos a facer. Temos que seguir crecendo pouco a pouco”.

Ao pouco da continuación, Arantxa superaba por baixo a López Lastra anotando o 3 a 0. Minutos despois, o Cidade das Burgas optaba polo xogo de cinco, que sería case definitivo cando desde cancha propia tras roubo de balón Laura Oliva anotaba o cuarto. A presión da Penya evitaba que as ourensás subiran con comodidade o balón. De aí ao final do choque as locais mantivéronse dominando o xogo ante un Cidade que non atopou armas para sorprender á Penya.