As cadetes galegas copan o podio do Ciclocross Internacional Ciutat de Sueca, integrado na Copa de España. De histórica pode calificarse a actuación das galegas cadetes na cita. María Filgueiras encabezou o triplete das nosas representantes. Seguiuna Uxía Soto que, segundo informa a Federación Galega de Ciclismo “repetiu o mesmo posto que rubricou no último Campionato de España” de Ciclocross. Para finalizar, e Aroa Otero fíxose coa terceira praza.
Tal e como informa a FGC o ciclocrós a nivel estatal regresou este domingo “do mesmo xeito que se despediu o pasado mes de xaneiro no Campionato de España de Pontevedra: con triunfo de Iván Feijoo (Nesta) nos sub23 e con exhibición galega nas cadetes. María Filgueiras (Caimanes) impúxose no circuíto valenciano de Sueca por diante de dúas corredoras do Avanza, a subcampioa española Uxía Soto e Aroa Otero. A quinta medalla dos nosos representantes nesta primeira cita da Copa de España acadouna André Martínez (Avanza) ao finalizar terceiro nos cadetes”.
Irene Trabazo, quinta en elite
Na proba raíña feminina desta cita de ciclocross Irene Trabazo estreouse como elite levándose a ‘medalla de chocolate’. Quinta na clasificación absoluta e cuarta na da súa nova categoría, a marinense do XSM cruzou a liña de meta a 1:33 da gañadora Alicia González (Nesta) e a 40″ de Aida Nuño, terceira.
A Copa de España de ciclocrós regresára o 14 de novembro coa proba de Cabezón de Pisuerga.