A elite nacional e mundial da bicicleta volverá a ofrecer o mellor dos espectáculos este sábado 8 de outubro en Pontevedra coa celebración do Ciclocrós Internacional Ciudad de Pontevedra, de categoría C1 e puntuable para a Copa de España da disciplina (trátase da segunda proba da mesma).
A organización deste Ciclocrós Internacional Ciudad de Pontevedra busca sentar as bases da celebración en 2024 do Campionato de Europa de Ciclocrós na cidade galega. Un obxectivo para o que traballan con afán as administracións e actores deportivos, que avanza polo bo camiño.
Será o circuíto de 3’4 quilómetros, cunhas condicións secas e por tanto a previsión de alta velocidade na disputa das probas, o escenario desta competición que organiza a Federación Galega de Ciclismo e patrocina o Concello de Pontevedra.
Cos últimos preparativos xa finalizados, ás 9h darase o pistoletazo de saída á competición coa disputa da proba junior. Alí daranse cita Carlos Gámez, gañador en Xixón, e tamén a gran baza galega Tomás Pombo (Cortizo Padronés). En mulleres a partir das 10:15h as favoritas serán Aroa Otero, Uxía Soto (ambas as do Supermercados Froiz) xunto a María Filgueiras (XSM) corredora do Río Miera Meruelo, aínda que adestra habitualmente co Club BTT Caimanes Betanzos.
A corredoras elite e Sub-23 buscarán ás 11:45h unha prestixiosa vitoria con moitas opcións para Lucía González (Nesta MMR), Olivia Onesti e Laura Verdonschot xunto a Sara Bonillo (Cams Basso), Sara Cueto (Unicaja) e Alicia González (Movistar).
Na quenda da proba masculina, Felipe Orts (Burgos BH), Kevin Suárez (Nesta MMR) e os galegos Iván Feijóo (Academia Postal Maceda) e Gonzalo Inguanzo (Supermercados Froiz) xunto aos holandeses Luke Verburg ou Stan pelexarán o título a partir das 13h.
Ciclocrós inclusivo
Ás 14:15 está prevista a proba de ciclocrós inclusivo, unha das novidades e aceno de identidade da carreira. Será a oportunidade para que os ciclistas con diversidade funcional poidan afrontar, nun percorrido idéntico, esta manga non competitiva. Unha apertura á integración, aos valores deste deporte e á superación que a través desta disciplina faise realidade sempre co galego Borja Gómez como gran referente e rompendo barreiras desde 2018.
Ver esta publicación en Instagram
Pola tarde será a quenda das/os cadetes que comezarán ás 17h. Canor Arboleya (Unicaja) e Lorena Patiño (XSM) terán o papel de favoritos polas súas boas actuacións en Xixón.
En canto aos veteranos, a próba máster 30, 50 e 60 masculina xunto a máster feminina do Ciclocrós Internacional Ciudad de Pontevedra disputarase ás 18h mentres que os máster 40 masculino poñerán o broche cunha numerosa manga que ten a saída programada ás 19h.
Poderase seguir o Ciclocrós Internacional Ciudad de Pontevedra nas redes
As redes sociais serán o mellor escaparate para non perderse detalle deste Ciclocrós Internacional Ciudad de Pontevedra, no que a narración en directo das diferentes mangas poderase seguir a través de Twitter @CXPontevedra. En Facebook, a páxina CX Pontevedra incluirá a información e material multimedia máis destacado, así como a conta de Instagram @CXPontevedra con recursos durante o desenvolvemento das carreiras.
Tamén se poderá recibir calquera actualización e novidade do evento a través da Canle de Telegram do Ciclocrós Internacional Ciudad de Pontevedra así como as clasificacións ao termo da competición.
Juan Carlos Muñiz salienta a posta de Pontevedra polo ciclocrós
O Ciclocrós Cidade de Pontevedra foi presentado no Concello de Pontevedra nun acto no que participaron o tenente de alcalde e concelleiro de Deportes, Tino Fernández; a deputada provincial Olga García Ballesteros; o presidente da Federación Ciclismo Galego, Juan Carlos Muñiz; o responsable de Deporte Escolar da Xunta, Santiago Ferrer, e mailo responsable técnico de Ciclocross da Federación, Alberto del Río.
Tal e como asegurou Juan Carlos Muñiz, presidente da Federación Ciclismo Galego, a aposta de Pontevedra polo ciclocrós traduciuse en que, en tan só sete anos, “pasamos dunha proba da Copa de Galicia a un Campionato de Galicia e directamente ao fito histórico de acoller dous campionatos de España consecutivos, e agora, a un C1 internacional, outra Copa de España e a sede de 2024 do grande Campionato de Europa, por primeira vez en España”.
🔵Carlos Muñiz, presidente de la @F_Gal_Ciclismo, os quiere invitar a todos a disfrutar del mejor ciclocross el próximo sábado en #CXPontevedra @Pontevedrate #CECXPontevedra22 #Ciclocross #Pontevedra #CX pic.twitter.com/J9y1KYeH2Q
— CX Pontevedra (@CXPontevedra) October 6, 2022
“En resumo, o ciclocrós de nivel nacional e internacional é unha realidade en Pontevedra e todo isto grazas á aposta do Concello e á colaboración da Deputación e a Xunta, así como dos patrocinadores e colaboradores privados. Estamos ante unha posta de largo de cara ao Campionato de Europa de 2024, cun Ciclocrós Internacional Cidade de Pontevedra que xa ten uns 500 inscritos e no que probablemente superemos os 600 participantes. Pontevedra xa foi récord de participación nos dous campionatos de España”, subliñou o presidente da Federación.
Segundo sinalou Tino Fernández, “o Concello de Pontevedra acostuma a traballar cunha estratexia de continuidade, xa que non somos partidarios de facer eventos illados cunha Federación ou un club, senón de ir mellorando da man da Federación correspondente, o que ten unha proba palpable no trazado que fixo o presidente: comezamos hai sete anos con campionatos galegos e pouco a pouco fomos crecendo coa vista posta en organizar carreiras internacionais, nunha Federación como a de Ciclismo, que ten moitas noivas á hora de organizar eventos”.
“Afortunadamente, todos estes eventos que fomos realizando ao longo dos anos fóronnos xerando un prestixio nacional e internacional que nos permitiu obtar á proba do Campionato de Europa 2024 e, como paso previo, organizamos esta proba C1, que é o crecemento lóxico e tamén un xeito de testar un circuíto e unha organización que xa foi testado, que lles gusta tanto aos participantes como ás federacións e que nos axudou a conseguir un Campionato de Europa, pero que sempre podemos mellorar. Temos a sorte de ter a Illa das Esculturas, que nos permite organizar este tipo de probas en pleno corazón de Pontevedra e iso é un valor a ter moi en conta”, precisou o edil Tino Fernández.
¿Tenéis ganas de #CXPontevedra22? Seguro que que con estas imágenes las ganas se multiplican 😇@F_Gal_Ciclismo @Pontevedrate #CECXPontevedra22 #Ciclocross #Pontevedra #CX pic.twitter.com/g3YhsbxOxc
— CX Pontevedra (@CXPontevedra) October 5, 2022
Olga García Ballesteros incidiu na aposta da Deputación de Pontevedra polo deporte, apoiando a organización de grandes eventos, así como na importancia de que se vaia acadar unha cifra de 600 deportistas nun fito de carácter internacional “que agardamos que se poida seguir celebrando en vindeiros anos”.
Pola súa banda, Santiago Ferrer afirmou que “para a Xunta é unha satisfacción estar nunha proba destas características, de nivel nacional, que se desenvolverá nun contorno dunhas características de paraíso deportivo, como é a Illa das Esculturas”. “Sabemos que o éxito de organización está garantido coa xente que está a traballar neste evento e tamén o será de participación”, apuntou o responsable autonómico.
O ‘efecto contaxio’ de Pontevedra
Juan Carlos Muñiz destacou que, grazas á aposta do Concello de Pontevedra, estase a producir “un efecto contaxio” no resto dos concellos galegos, posto que “imos ter cinco probas internacionais, algo que ningunha outra federación autonómica acadou”.
“Iniciamos aquí, este sábado, a primeira proba internacional, e despois, o domingo en Marín, o 12 nas Pontes e outras dúas máis internacionais na provincia. Teremos participantes de Francia, Bélxica, Inglaterra, Estados Unidos, Italia… O que vai ser un escaparate para esta modalidade deportiva. E ademais, tampouco hai ningunha outra comunidade que teña 20 probas no calendario nacional e internacional. Pontevedra conta co mellor estadio improvisado do mundo para o ciclocross, que é o parque da Illa das Esculturas. Levamos uns cinco circuítos nesta cidade e non se repetiu ningún. Non coñecemos outro sitio no mundo con este contorno, accesos, zonas de servizos e infraestruturas”, engadiu Juan Carlos Muñíz, presidente da Federación Galega.
O percorrido desta carreira ciclista bordea o Lérez
No que atinxe ao percorrido do Ciclocrós Internacional Ciudad de Pontevedra, mantense a esencia dun circuíto que bordea o río Lérez, onde a vantaxe está sempre do lado dos corredores máis potentes e con longas rectas nas que se chegarán a superar os 35 kilómetros por hora (a ausencia de choiva garante a rapidez da carreira).
As zonas técnicas deste Ciclocrós Internacional Ciudad de Pontevedra, como a dura rampla xusto antes de meta, apertarán aínda máis as mangas que cheguen igualadas ao final.
➡️INFORMACIÓN IMPORTANTE: Os dejamos el plano con la localización de los aparcamientos y los horarios para la solicitud de acreditaciones @F_Gal_Ciclismo @Pontevedrate #CXPontevedra22 #CECXPontevedra22 #Ciclocross #Pontevedra #CX pic.twitter.com/m1ATKfGpg4
— CX Pontevedra (@CXPontevedra) October 6, 2022
O circuíto do Ciclocrós Internacional Ciudad de Pontevedra redúcese levemente en distancia, xa que se elimina unha das ramplas na zona do colexio. Os puntos quentes do percorrido de 3,4 kilómetros serán a zona de tablóns antes do box, que tamén reduce a velocidade neste punto, as escaleiras, e o zigzag na ladeira e último repecho antes da meta.
