Fantásticos resultados do ciclocrós galego na Copa de España 2022 na terceira xornada do certame estatal. Despois dos éxitos obtidos en Gijón e Pontevedra, a armada autonómica acumulou tres vitorias e outros tres podios no circuíto barcelonés de Les Franqueses. A tripla das juniors, encabezada por Uxía Soto (Supermecados Froiz), e o segundo posto elite de Irene Trabazo (XSM) sobresaíron especialmente nunha cita na que a cadete Lorena Patiño (XSM) e o máster-40 Andrés Calvete (Monte Xalo) subiron ao máis alto do podio.
A proba raíña feminina contou con tres galegas entre as cinco primeiras da clasificación absoluta. A marinense Irene Trabazo e Sara Cueto (Unicaja) brindaron unha fermosa pugna entre corredoras elites ata o ecuador da carreira e a partir de aí a do XSM non puido seguir o ritmo da asturiana, que se impuxo por 30 segundos de diferenza. A terceira praza, a 1:38 da gañadora, correspondeu á sub23 Sara Bonillo (Cams-Basso).
A cuarta e a quinta posicións absolutas da Copa de España 2022 ocupáronas dúas juniors galegas. Uxía Soto e María Filgueiras (XSM) medíronse nun duelo, no que ademais do triunfo xuvenil, estaba en xogo o liderado porque a porriñesa Aroa Otero (Supermercados Froiz), a portadora da camisola da Copa, cedeu terreo e tivo que conformarse co terceiro posto. O dobre premio do maillot e da vitoria acabou obténdoo a ponteareá tras distanciarse en 21″ da betanceira e cruzando a liña de meta a 1:55 da vencedora absoluta Sara Cueto.
O outro maillot de líder que mantén o ciclocrós da nosa comunidade nesta Copa de España 2022 lúceo Lorena Patiño. A marinense do XSM prolongou a súa condición de invicta, pero nesta ocasión tivo que apertar os dentes ata os últimos metros da carreira cadete. Por 6″ de diferenza bateu á valenciana Leyre Almena (Teika) e, deste xeito, rubricou o seu terceiro éxito parcial nesta edición da Copa de España. O podio completouno Carmela Solares (Unicaja) tras finalizar a 1:38 da galega.
Resultados dos galegos nesta Copa de España de ciclocrós
Aos dous triunfos femininos hai que engadir no balance autonómico o de Andrés Calvete nos máster-40. Segundo en Gijón e en Pontevedra, o cambrés do Monte Xalo decantou esta vez ao seu favor o pulso co líder Isaac Suárez (Nesta) e fíxoo por 1’04” de vantaxe. O asturiano e o galego están agora separados por 5 puntos na xeral.
A piques de subir ao podio quedouse Miguel Rodríguez (Supermercados Froiz), cuarto entre os Sub23 e quinto na clasificación absoluta. O ponteareán disputou un esprint pola terceira praza da súa categoría na recta de meta con Diego Ruiz de Arcaute (Caja Rural), a quen non puido bater. Anxo Carril (Coruxo) fixo oitavo nos sub23, mesmo posto que asinou o seu compañeiro de club Mauro Vega nos cadetes.
A fin de semana que vén terán lugar en Llodio e Karrantza a cuarta e a quinta proba da Copa de España 2022 de ciclocrós. Toda a información do certame pódese seguir na súa páxina web e nas redes sociais a través do hashtag #CopaEspañaCX.
