O Gran Premio Ciclocros Cidade de Pontevedra, de categoría C1 UCI, disputou na mañá deste sábado as probas internacionais. A proba tamén foi puntuable para a Copa de España de CX. Cunha participación de luxo, non defraudou o espectáculo que ofreceron os ciclistas e no escenario que acollerá o Campionato de Europa da disciplina en 2024.
A competición do Ciclocrós Cidade de Pontevedra arrincou ás 9h coa disputa da proba júnior masculina na que desde os primeiros metros impuxeron o seu ritmo os corredores italianos, formándose un grupo duns doce ciclistas que comezaría a romper superado o ecuador da carreira. Moi activos os transalpinos, lograron colocarse nas tres primeiras posicións para afrontar unha última volta na que o campión Samuele Scappini foi o máis forte, levándose o triunfo por diante do seu compatriota Tommaso Cafueri e do francés Fantin Gloux. Carlos Gámez logrou manter o liderado da Copa de España tras finalizar sétimo.
Na proba júnior feminina do Ciclocrós Cidade de Pontevedra viviuse unha emocionante carreira, tamén protagonizada polas italianas Federica Venturelli e Valentina Corvi que marcaron o ritmo desde o inicio. Moi ben colocadas María Filgueiras e Uxía Soto aguantaron o ritmo na cabeza, aínda que peor sorte tivo Aroa Otero que tras unha caída rodou por detrás. Soto tentouno, aínda que foi neutralizada xa na volta final, quedando eliminada Corvi por problemas mecánicos. Xa na recta final Venturelli non deu opción a María Filgueiras que finalizou segunda mentres que Uxía Soto acusou o esforzo e non puido disputar o triunfo quedando terceira. Aroa Otero, cuarta finalmente, logrou manter o liderado da Copa de España.
Ás 11:45h deu comezo a proba feminina na que todas as miradas centrábanse na campioa de España e líder da Copa, Lucía González, que non defraudou. Desde a primeira volta marcou o ritmo a asturiana escapándose xunto á súa compañeira Sofía Rodríguez para vivir un duelo moi parecido ao que protagonizaron en Gijón. Rodaron xuntas toda a proba as dúas ciclistas do Nesta-MMR, pero na meta Lucía González non deu opción á valenciana, e logrando o seu segundo triunfo desta Copa de España.
Case enlazando coa cerimonia do podio feminino, deu comezo a proba masculina con grandes nomes internacionais que demostraron o seu bo facer nas campas. Arrincou moi rápida a carreira, seleccionándose pronto un grupo de favoritos, do que tivo que descolgarse o vencedor do pasado ano Kevin Suárez debido a unha rotura do cambio. Pronto comezou a marcar un duro ritmo na cabeza Ryan Kamp, rompendo o grupo e escapándose en solitario en busca da vitoria, tras el Felipe Orts mantivo a vantaxe xunto a Luke Verburg, que liderou en todo momento a proba sub-23. Hai que destacar a gran remontada de Kevin Suárez tras a súa avaría que finalizou cuarto e mantén o liderado da Copa de España.
Antes do parón de mediodía, disputouse a proba de ciclismo inclusivo. Unha manga non competitiva na que persoas con diversidade funcional puideron percorrer o circuíto e afrontar no mesmo escenario que o resto de categorías unha bonita oportunidade. O ciclismo e o deporte, cos seus valores de inclusión, non deixaron a ninguén atrás neste Ciclocrós Internacional Cidade de Pontevedra.
Tras a intensa xornada matutina, a tarde comezou coa disputa da manga cadete na que tomaron primeiro a saída as mulleres da categoría, para uns minutos despois saír os mozos. Na proba masculina viviuse unha bonita loita entre Eric Igual, Óscar Orts e Roc Cubí, que na volta final decantouse cara ao líder da Copa de España. Vitoria con relativa comodidade e máis vantaxe para el na xeral do certame.
A proba feminina do Ciclocrós Cidade de Pontevedra tivo menos historia xa que a líder da Copa, Lorena Patiño non quixo sorpresas e logrou abrir vantaxe case desde o inicio para facerse co triunfo de forma moi solvente. Acompañáronlle no podio Leyre Almea e Lida Castro.
Chegou a quenda da primeira manga máster na que competiron os máster 30, 50 e 60 xunto ás mulleres masters. A vitoria nos máster 30 levouna José Luis Blanco, por diante de Miguel Llaneza e Josep Chavarría; en máster 50 triunfou José Luis Rebollo, e estivo acompañado no podio por Marco Antonio Prieto e Antonio Sousa; en máster 60 repetiu triunfo Abelardo Martínez, impoñéndose a Manuel González Ojea e Jesús Manuel Fernández.
Nas categorías femininas do Ciclocrós Cidade de Pontevedra , Beatriz Megido impúxose en máster 30, en máster 40 venceu Marina González a Ruth Moll e Cleiren Veerle, mentres que en máster 50 ninguén puido con Isabel Castro que estivo acompañada no podio por Sonia Costoya e María del Carmen Armada.
A competición neste Ciclocrós Cidade de Pontevedra finalizou coa proba máster 40, na que de novo, como pasou en Gijón, obtivo o triunfo o excampión de España Isaac Suárez. Xunto ao de Los Corrales de Buelna estiveron no podio Andrés Calvete e José Domingo Cadavieco.
Nas entregas de premios estiveron presentes Tino Fernández, concelleiro de deportes do Concello de Pontevedra; Ana Laura Iglesias, deputada provincial de Turismo da Deputación de Pontevedra; Delio Fernández, ciclista profesional; Juan Carlos Muñiz, presidente da Federación Ciclismo Galego e David Carrillo, secretario da Federación Ciclismo Galego.
O fin de festa e o gran sabor de boca da proba a nivel tanto organizativo como deportivo, convértese en motivo de parabéns para todos os axentes implicados. O Concello de Pontevedra como patrocinador e a Federación Ciclismo Galego avanzan así no seu gran obxectivo: a disputa en 2024 do Campionato de Europa na Illa das Esculturas de Pontevedra.
Balance do ciclismo galego no Gran Premio Ciclocros Cidade de Pontevedra
Ás oito presenzas no podio e catro camisolas de líder acadadas pola representación galega, hai que engadir os seguintes postos no top-10:
- Cadetes masculinos: sexto Mauro Vega (Coruxo), oitavo Santiago López (XSM) e décimo Xian Alvariño (Ponteareas)
- Cadetes femininas: cuarta Iris Fernández (Academia Postal-Maceda), sexta Alba Gregores (Ponteareas), décima Alejandra Neira (Compostelano)
- Júnior masculino: décimo Tomás Pombo (Padronés-Cortizo)
- Júnior feminina: décima Xiana Camiña (Avanza-O Porriño)
- Sub23 masculino: décimo Miguel Rodríguez (Supermercados Froiz)
- Sub23 feminina: quinta Laura Mira (Supermercados Froiz)
- Elites masculinos: cuarto Iván Feijoo (Academia Postal-Maceda), sétimo Samuel González (Máis Que Bicis).
- Elites femininas: sétima Irene Trabazo (XSM), décima María Jesús Barros (Team Oiense)
- Máster-30 masculinos: sexto Alejandro Mesías (CiclosQuintena), oitavo Jorge Pérez (Os Esfola Arrós)
- Máster-40 femininas: quinta Nazaret Casal (Lasal Cocinas-Louriña), novena Laura Rodríguez (Toxo), décima Andrea Pousada (Poio Bike)
- Máster-40 masculinos: cuarto Constantino Muñoz (Grupeta Pan de Zarko), sétimo Moisés Leboso (G.D. 10), noveno Manuel Armada (Cidade de Santiago)
- Máster-50 masculinos: sexto José Manuel Comesaña (Monteferro), sétimo Miguel Rey (Arteixo-MB3), oitavo José Manuel Gómez (Xesteiras), noveno Mario Castro (Speedcross), décimo José Ramón Caamaño (Chantadino)
- Máster-60 masculinos: quinto Antonio González (Salvaterra), sexto Manuel Dorrio (Cambre), sétimo José Manuel González (Academia Postal-Maceda), oitavo Constante Lestido (Speedcross)
