- O debut mundialista no ciclocrós da miñense María Filgueiras e a pontareá Uxía Soto rematou coas galegas en 28ª e 45ª posición na categoría junior.
O Campionato do Mundo de Ciclocrós 2023 celebrado na localidade neerlandesa de Hoogerheide será recordado polo dobrete local nas carreiras Elite, por medio de Fem van Empel e de Mathieu Van der Poel, e a nivel galego pola estrea de dúas promesas femininas na cita máis importante do planeta CX.
A ciclista do Concello de Miño María Filgueiras e a ponteareá Uxía Soto foron as dúas representantes da selección española (RFEC) na carreira júnior disputada este sábado. Tanto a corredora do XSM como a do Supermercados Froiz completaron a proba, obtendo a 28ª e a 45ª posición, respectivamente, segundo informa a Federación Ciclismo Galego (FCG).
As dúas primeiras clasificadas na Copa de España 2022 medíronse ás mellores xuvenís do mundo nun circuíto duro e nun día húmido.
Así foi a carreira neste Mundial de ciclocrós 2023
A ciclista María Filgueiras, júnior de primeiro ano, estableceuse durante toda a carreira ao redor do posto 30 e realizando un bo final alcanzou a 28ª posición, rematando a 4 minutos da gañadora Isabella Holmgren (Canadá). A liña de meta cruzouna a de Miño 4′ despois que a súa compañeira de selección, a pontareá Uxía Soto, unha corredora que a vindeira temporada buscará seguir coa súa progresión na categoría Sub-23.
Entre as dez primeiras clasificáronse as italianas Federica Venturelli, cuarta, e Valentina Corvi, décima. As dúas ciclistas transalpinas estiveron en outubro coa súa selección participando nas probas internacionais que tiveron como escenario a nosa comunidade. Con aqueles eventos comezou unha temporada histórica para o ciclocrós galego, unha campaña chea de carreiras, de éxitos a nivel estatal e co broche dun dobre debut mundialista.
Ver esta publicación en Instagram
