O Ulla Oil Rosalía ten opcións de lograr a permanencia e o saben. “Unha vitoria máis nos achegaría case definitivamente ao obxectivo da permanencia”, apunta o adestrador Chiqui Barros. É por iso que as brancas afrontan o partido deste sábado, ás 17:00 horas, contra o Vega Lagunera Adareva Tenerife con moita “ilusión”.
“Outra xornada máis e moi importante”, recorda Barros. As compostelás chegan dunha derrota ante un rival metido na parte alta da clasificación, o Extremadura Miralvalle Plasencia, pero ocupando a décima posición na táboa e a só catro puntos do seu seguinte rival.
O Tenerife é un equipo que a xogadora Sara Corredoira define como “moi físico”, polo que o Rosalía afronta este duelo centrándose no “rebote e parar ás xogadoras moi determinantes da Liga, como é Dembele”.
Sara Corredoira: “Temos que estar ben no rebote e parar ás xogadoras moi determinantes da Liga, como é Dembele”
A baloncestista do conxunto canario é a máxima anotadora, cunha media de 19,68. Unha xogadora que non perdoa baixo o aro e que destaca polo seu xogo desequilibrante.
Así o expresa o técnico Chiqui Barros, que apunta que esta é “unha xogadora de referencia, pero non podemos obviar o talento do resto do equipo”.
Porén, o adestrador do Rosalía móstrase optimista e malia que a parte baixa da Liga Feminina 2 está moi igualada, considera que o seu cadro chega “moi ben a este tramo final. Quizais coa incertidume de ver se ao final, que eu teño serias dúbidas, poderemos contar con Leti, despois da súa baixa ante o Miralvalle“.
Chiqui Barros: “Chegamos moi ben a este tramo final”
Pero o movemento demóstrase andando, e o equipo de Barros deberá demostrar na súa pista (volvendo a casa despois de ter que xogar como locais noutro pavillón ante o Cortegada), se merecen ou non estar na categoría de prata.
As claves de Barros para vencer ao Tenerife
Chiqui Barros recoñece na súa análise ao equipo rival que este destaca por ser “un equipo moi físico, con xogadoras desequilibrantes. Un conxunto forte no rebote e moi bo nos seus movementos”.
Estes serán os aspectos aos que deberán atender as súas pupilar, á vez que, como sinala Corredoira “aproveitar ao máximo as nosas vantaxes”.
Como de costume, o partido podera seguirse vía streaming no Canal FEB.
