- Xa están en terras galegas as futbolistas do equipo cadete do Erin Go Bragh de Dublín que realizan un intercambio cultural e deportivo cos/as deportistas da Gaélico Escola PuntoGal do C.P.I. Plurilingüe Antonio Orza Couto do Forte (Boqueixón) en pleno samaín galego e samhain irlandés no que pretende ser un achegamento entre culturas celtas co nome de Celtic Week.
- Alexandre Sanmartín, coordinador das Gaélico Escolas PuntoGal: “Trátase dunha primeira experiencia que pretende, como a Celtic Cup dos adultos, ir crecendo co paso dos anos”
As futbolistas do Eirin Go Bragh de Dublín (Irlanda) xa están en terras galegas compartindo tempo e experiencias cos deportistas das Gaélico Escolas PuntoGal do C.P.I. Plurilingüe Antonio Orza Couto, en O Forte (Boqueixón). Entre as actividades da chamada Celtic Week destaca un partido de fútbol gaélico. Un amigable internacional desta disciplina que terá lugar o mércores a partir das 15:30 horas no campo do Forte (Boqueixón) e que contará como terceiro tempo cun magosto compartindo así tradicións entre pobos celtas.
Tal e como declaraba Alexandre Sanmartín ‘Jano’, coordinador xeral das ‘Gaélico Escolas PuntoGal’ da Asociación Galega de Fútbol Gaélico (AGFG) esta actividade nace con vocación de perdurar no tempo. “Trátase dunha primeira experiencia que pretende, como a Celtic Cup dos adultos, ir crecendo co paso dos anos”, manifestou.
A convivencia e coñecemento mutuo é o que busca promover a Celtic Week da man da Asociación Galega de Fútbol Gaélico (AGFG). Ademais de visitas culturais, non vai faltar a práctica do fútbol gaélico nestas datas de convivencia e unión entre culturas celtas con rapazada de Irlanda e Galicia como protagonistas.
Nesa primeira edición da Celtic Week o equipo cadete do club irlandés Eirin Go Bragh radicado en Dublín visitará Galicia durante esta última semana do mes de outubro. Na expedición acuden unhas 20 rapazas de entre 14-15 anos. Neses días compartirán experiencias coa mocidade da Gaélico Escola PuntoGal de Boqueixón, en concreto do C.P.I. Plurilingüe Antonio Orza Couto, en O Forte. Chegaron onte, día 28 de outubro e está prevista a súa estancia en Galicia ata o 31 de outubro, data na que regresarán a Irlanda.
Para o terceiro tempo da Celtic Week, un magosto
O programa de actividades inclúe, entre doutras, unha visita a Compostela hoxe martes 29 de outubro na que pasarán polo Camiño de Santiago. O mércores 30 acudirán ao Museo do Pobo Galego e posteriormente ese mesmo día chegará o tempo para o fútbol gaélico. A partir das 15:30 horas e aproximadamente ata as 17:30 horas xogarán un amigable co alumnado do C.P.I. Plurilingüe Antonio Orza Couto que está en O Forte (Boqueixón). No terceiro tempo deste encontro, un momento imprescindible no fútbol gaélico, está previsto que se leve a cabo un magosto, unha das festas gastronómicas galegas ligada a estas datas.
Ver esta publicación en Instagram
O xoves 31 o programa desta Celtic Week ten prevista a visita das xogadoras do club irlandés Erin Go Bragh ao Aquarium Finisterrae da Coruña, un dos museos científicos coruñeses que, neste caso, dedícase a educación ambiental e á divulgación científica dos temas mariños.
Así neste final de outubro Galicia acollerá un achegamento entre o futuro do fútbol gaélico galego e o irlandés, e tamén entre da cultura que temos en común dous lugares ligados ao mundo celta, xusto na semana do Samaín, unha data significativa nesta cultura.
Que é a Asociación Galega de Fútbol Gaélico
A Asociación Galega de Fútbol Gaélico (AGFG) é o organismo regulador oficial do fútbol gaélico en Galicia, dende a súa aprobación oficial na convención Europea dos deportes gaélicos en decembro de 2013, o cal garántelle de carácter oficial internacional recoñecido polo máximo órgano, a Gaelic Athletic Asociation (GAA).
Boa parte das actividades da AGFGintégranse dentro da RFGF (Real Federación Galega de Fútbol).
PuntoGal é un dos patrocinadores da AGFG que ademais emprega na súa web o dominio www.gaelicogalego.gal.
