- A final feminina da Supercopa de fútbol gaélico será entre o Auriense e o Turonia Gondomar e a masculina xógana Keltoi e Estrela Vermelha.
O Campo da Universidade de Ourense acolle a Supercopa de fútbol gaélico masculina e feminina, organizadas pola Asociación Galega de Fútbol Gaélico (AGFG). Ambos os dous encontros xogaranse en horario de tarde o vindeiro sábado 27 de setembro e serán transmitidos por agalega.gal.
Os encontros responden a estes horarios e rivais:
- Supercopa masculina (17:00 horas): Keltoi vs Estrela Vermelha
- Supercopa Feminina (18:30 horas): Auriense vs Turonia Gondomar
Aínda que o habitual é que a Supercopa enfronte aos equipos vencedores da Liga e Copa, neste caso hai pequenas variacións. No caso da Supercopa masculina de fútbol gaélico ao darse o dobrete do Keltoi (campión de Liga e Copa) o seu rival e o subcampión de Liga e Copa, o Estrela Vermelha.
No caso da Supercopa feminina de fútbol gaélico produciuse a renuncia (por falta de efectivos neste arranque de competición) das campioas de Liga que foron as futbolistas do Estrela Vermelha. De aí que xoguen o Auriense (campioas de Copa, subcampioas de Liga) e o Turonia Gondomar (terceiras en Liga e subcampioas de Copa).
Ver esta publicación en Instagram
Torneo de apertura amigable en horario de mañá
Esta será a última competición da tempada 2024-25 e dispútase a un paso do comezo da 2025-26. De feito, pola mañá, no mesmo escenario do Campo da Universidade de Ourense, está previsto que se dispute un torneo apertura. Trátase dunha competición de carácter amigable, entre o resto de equipos que participarán na Liga.
Este tipo de torneos están orientados a que as novas incorporacións dos diferentes clubs, ou aquelas persoas interesadas en iniciarse na práctica do fútbol gaélico, se animen a probar en partidos digamos “de verdade”, complementando así os adestramentos de pretempada que están levando a cabo os equipos nos seus diferentes clubs.
Que é a AGFG?
A Asociación Galega de Fútbol Gaélico (AGFG) é o organismo regulador oficial do fútbol gaélico en Galicia, dende a súa aprobación oficial na convención Europea dos deportes gaélicos en decembro de 2013, o cal garántelle de carácter oficial internacional recoñecido polo máximo órgano, a Gaelic Athletic Asociation (GAA).
Boa parte das actividades da AGFG intégranse dentro da RFGF (Real Federación Galega de Fútbol).
PuntoGal é un dos patrocinadores da AGFG que ademais emprega na súa web o dominio www.gaelicogalego.gal.
