- A temporada 2025 da Liga Galega de Traiñeiras pechouse oficialmente no acto celebrado no Centro Galego de Tecnificación Deportiva en Pontevedra
O calendario da Liga Galega de Traiñeiras – Trofeo Xunta de Galicia rematou o 24 de agosto, pero quedaba pendente a entrega dos premios finais da temporada para poñer o broche de ouro á campaña 2025.
A Gala de Clausura anual celebrouse este sábado na gran casa do deporte autonómico, no Centro Galego de Tecnificación Deportiva (CGTD) en Pontevedra. Ademais de coroar ás tres tripulacións que conquistaron os títulos, outorgáronse outros galardóns a nivel colectivo e individual.
Ver esta publicación en Instagram
Chapela – Wofco foi o gran triunfador deste curso. O club redondelán asinou un ‘dobrete’ que non se daba dende o ano 2014. A guinda a adxudicarse a Liga Feminina e a Liga A púxoa o 21 de setembro acadando coa súa tripulación masculina o ascenso á Eusko Label Liga. Por ese motivo, o equipo adestrado por Juan Zunzunegui levouse unha dobre ovación no CGTD ao recoller a bandeira da Liga A despois de que Tirán-Pereira recibira as medallas de prata e Samertolameu-Oversea, as de bronce.
Chapela – Wofco, triunfador, e Amegrove, revelación
Na Liga Feminina, Chapela – Wofco liderou a clasificación por terceiro ano consecutivo. As súas remeiras volveron a ondear a bandeira máis cobizada da temporada, título que volverán defender a próxima campaña. Tirán-Pereira conseguiu outro subcampionato e a terceira praza ocupouna Amegrove, a embarcación que tamén recibiu a distinción de Equipo Revelación nas tres categorías do Trofeo Xunta de Galicia.
O cadro de campións completouno A Cabana Ferrol, gañador invicto da Liga B. A Albatros asinou un regreso inmellorable á Liga Galega de Traiñeiras e a vindeira campaña remará na Liga A.
Os outros postos de podio na segunda categoría masculina corresponderon a Puebla, segunda clasificada, e á filial de Chapela – Wofco, terceira.
Natalia Tubío, de Cabo da Cruz, mellor patroa
No aspecto individual, Natalia Tubío (Cabo da Cruz) foi elixida como mellor patroa da Liga Feminina, recoñecemento que na Liga B recaeu en Asier Pino (Chapela-Wofco B) e na Liga A en Iván Lema (Narón).
Durante a Gala tomaron a palabra José Ramón Lete Lasa, secretario xeral para o Deporte da Xunta de Galicia, e Javier Rodríguez, presidente da Asociación Liga do Noroeste. Ambos destacaron o crecemento experimentado pola Liga Feminina, que este ano asinou un récord de participación con dez embarcacións, e sinalaron aspectos a mellorar dentro da estabilidade e bo funcionamento da competición.
Tamén asistiron a este acto de clausura José Luis Méndez, presidente da Federación Galega de Remo, e Jesús López, director do CGTD.
No transcurso desta A Gala de Clausura anual da Liga Galega de Traiñeiras – Trofeo Xunta de Galicia Lete Lasa destacou a figura de Juan Zunzunegui, diploma olímpicos nos Xogos de Atenas 2004 no dobre scull lixeiro e que hoxe lidera a traiñeira Chapela – Wofco nos seus éxitos.
Así, o secretario xeral enxalzou o momento do remo galego en todas as súas modalidades, banco móbil e fixo, cos diplomas de Caetano Horta e Rodrigo Conde nos Xogos Olímpicos de París, así como todo o acadado por taiñeiras, trainerillas e bateis.
Lete Lasa subliñou a maxia da Liga Galega de Traiñeiras que “transforma a tradición en competición, en saúde, para que os equipos consigan vitorias que engrandecen ese sentimento colectivo que nos une”.
José Ramón Lete Lasa: “A Liga Galega de Traiñeiras transforma a tradición en competición, en saúde, para que os equipos consigan vitorias que engrandecen ese sentimento colectivo que nos une”.
Neste sentido lembrou como comezou a liga, alá polo 2003, con 16 embarcacións e dez regatas nunha única categoría, mentres “hoxe son 26 traiñeiras en dúas categorías masculinas e unha feminina que disputan 27 regatas retransmitidas pola TVG”.
O responsable do Deporte galego informou do apoio da Xunta de Galicia que, neste ano, incrementou a súa aposta pola liga ata os 143.000 euros, un 15% máis que tamén se reflicte no aumento de licenzas que xa roldan as 3.000, sendo un 40% de mulleres.
