O peirao de Bueu acolle esta fin de semana a celebración do LXXV Campionato de España de Traineriñas, coa tripulación do CR Chapela como favorita feminina. Na lista de embarcacións galegas femininas en liza figuran CR Chapela, CR Ares, CR Cabo da Cruz, CR Rianxo, SD Tiran, CR Mecos, CR A Pobra e CCD Cesantes, na categoría absoluta e o CR Náutico Riveira e CCD Cesantes na xuvenil que celebra esta regata estatal por vez primeira.
Será esta 75º edición do Campionato de España de Traineriñas unha cita algo deslucida en termos competitivos por mor da renuncia de boa parte de embarcacións cántabras e vascas para acudir á competición, pero na que Galicia contará cunha boa representación.
O percorrido que terán que realizar os equipos consta dun total de 4 longos e 3 ciabogas, con saída dende o porto de Bueu cara a praia de Portomaior, para completar un total de 3.500 metros dos que consta a proba organizada polo Club do Mar Bueu.
Clasifícanse para a final os 2 primeiros clasificados de cada quenda e o terceiro mellor tempo. Na categoría xuvenil feminina a final será directa, ao ser so catro os equipos participantes da mesma.
O CR Chapela vén de gañar o Campionato Galego
As remeiras do Club de Remo Chapela parten como principais favoritas para lograr o triunfo neste campionato, tras impoñerse o pasado fin de semana en Moaña no Campionato Galego da modalidade por diante de Ares e Cabo da Cruz.
Tanto na categoría absoluta feminina como na masculina a totalidade das embarcacións participantes serán galegas, polo que se esperan unhas finais con un final apaixoante como os vistos no Campionato Galego, tanto en xuvenís como en absolutos, entre Cabo da Cruz e Samertolameu.
#CampeonatoDeEspañaDeTrainerillas
📅 28 y 29 de mayo de 2022
📍Bueu (Pontevedra) @Club_DoMar_Bueu
⚠️ Cierre inscripciones: 23 de mayo a las 23:59h
ℹ️ https://t.co/2NtSA7gPE1#Remo #RemoEsp #rowing @COE_es @Paralimpicos @deportegob @JomaSport @halconviajes @Toyota_Esp pic.twitter.com/AIPEcKcHsn— Fed.Española de Remo (@fed_esp_remo) May 17, 2022
O listado de equipos participantes por categorías é o seguinte:
Categoría Xuvenil Feminina:
- Galicia: CR Náutico Riveira e CCD Cesantes
- Cantabria: CR Camargo
- Euskadi: SDR Kaiku e Isuntza AE
Categoría Absoluta Femenina:
- Galicia: CR Chapela, CR Ares, CR Cabo da Cruz, CR Rianxo, SD Tiran, CR Mecos, CR A Pobra e CCD Cesantes.
Categoría Xuvenil Masculina:
- Galicia: CR Cabo da Cruz, CR A Pobra, SD Samertolameu e CR Chapela
- Cantabria: AD Castreña
- Euskadi: Itsasoko Ama-Santurtzi, SDR Kaiku e Ondarroa AE
Categoría Absoluta Masculina:
- Asturias: CM Castropol
- Galicia: CR Cabo da Cruz, SD Samertolameu, CM Bueu, CR Ares, CR Robaleira, CR Rianxo e CR Mecos.
O horario de competición en augas de Bueu será a partir das 18:00 horas o sábado 28 para a disputa das eliminatorias. O domingo 29 iniciarán a xornada as finais B, a partir das 10:30 horas, e ás 12:00 horas disputaranse as quendas das finais A.
A presentación deste Campionato de España de Traineriñas 2022 tivo lugar no salón de plenos da Casa do Concello de Bueu. No acto estiveron presentes Félix Juncal, alcalde de Bueu, Ricardo Verde, concelleiro de deportes, Manuel Juncal e Javier Pazos, ambos da directiva do Club do Mar Bueu – Teccarsa, José Manuel Seijas, presidente da Federación Galega de Remo, e Daniel Benavides, xefe do Servizo de Deportes da Xunta de Galicia.
Félix Juncal destacaba que “dende o Concello de Bueu apostamos sempre polo deporte de base e de alta competición, e consideramos que estes eventos proxectan o nome de Bueu”, ademais de loar o traballo levado a cabo nos últimos anos polo Club do Mar Bueu – Teccarsa. Pola súa banda, Daniel Benavides salientou que “estes eventos deportivos crean sinerxías con toda a actividade da vila, e por iso son moi importantes”.
