Hoxe domingo 21 de maio a cidade checa de Podebrady celebrará o Campionato de Europa de Marcha por equipos a onde a Selección Española acude cun equipo moi competitivo integrado por 22 atletas.
Entre a relación de atletas seleccionadas figura a presenza das marchadoras galegas Antía Chamosa e Carmen Escaríz que competirán na proba dos 20 km, e da marchadora Sub-20 Aldara Meilán quen tomará parte na proba dos 10 km.
Para a dobre medallista nacional dos 20 e 35 Km e bronce europeo Sub-23 Antía Chamosa, esta será unha excelente oportunidade de reafirmar a súa calidade logo dunha contínua e imparable progresión levada a cabo nos últimos anos. Carmen Escaríz nun ano complicado de lesións, volve a unha gran competición con moita motivación e gañas de amosar o seu gran potencial diante das máis importantes marchadoras do momento.
Para a terceira das galegas, Aldara Meilán, Podebrady convírtese nunha nova excelente oportunidade para medrar e gañar en experiencia a nivel internacional. A campioa de España Sub-18, que está chamada a ser un dos referentes da marcha nacional e mesmo internacional nun futuro próximo, tomará parte co equipo Sub-20 na proba dos 10 Km.
Por último, tamén salientamos a presenza da xuiza nivel II ourensá Mercedes Diéguez quen formará parte da expedición oficial que viaxe ata a localidade checa.
A lista completa de marchadoras e marchadores que competirán con España é a seguinte:
FEMININO
- 20 km – Antía Chamosa, Carmen Escariz, Mar Juárez, Lucía Redondo
- 35 km – Raquel González, Paula Juárez, Cristina Montesinos, María Pérez
- 10 km sub20 – Aldara Meilán, Sofía Santacreu, Griselda Serret
MASCULINO
- 20 km – Alberto Amezcua, Diego García, Álvaro López, Paul McGrath
- 35 km – Manuel Bermúdez, Miguel Ángel López, Álvaro Martín, Marc Tur
- 10 km sub20 – Daniel Morilla, Pablo Postigo, Pablo Rodríguez
