A Pobra do Caramiñal acolleu o Campionato Galego de Marcha en Ruta. Nel, Antía Chamosa confirmou por que partía como favorita colgándose o ouro da categoría feminina.
A atleta da Sociedad Gimnástica de Pontevedra mellorou a súa marca de sempre nos 10 km. Chamosa parou o cronómetro nos 46:49, logrando un récord galego sub23. Así mesmo, a pontevedresa fixo dobrete, sendo campioa en absoluta e sub23.
Este resultado permitiulle preparar a Copa de Europa de Marcha, prevista para o 16 de maio en Podebrady. Nela, a atleta fará os 35 km formando parte do equipo da Selección Española.
O podio de Chamosa complétase con Escaríz e Rivas
Ao podio da categoría absoluta tamén suberon Carmen Escaríz, do Ourense Atletismo, e Iria Rivas, do Ría Ferrol. A primeira delas fixo unha marca de 47:46, quedando cuarta no ránking xeral. Pola súa banda, a segunda o fixo en 53:07, quedando novena na clasificación xeral.
Na proba sub20 o ouro foi para Alba Pérez, do CA Negreira, cun tempo de 56:53. En M45 Emilia Rodríguez, do Trega, foi campioa parando o reloxo en 58:37, mentres que en F55 a primeira posición foi de Raquel Fernández, do Ourense Atletismo, cun 1:24.13.
Consulta aquí todos os resultados:
