Cely Gayardo xa pode empezar a pensar na súa recuperación, tras a exitosa intervención desta mañá, martes 16 de febreiro, do seu xeonllo esquerdo. Nun video previo á intervención, a futbolista agradece “o apoio” que está recibindo e amósase confiada no equipo médico e na novidosa técnica elixida.
A operación foi precisa por mor dunha artrose uncompartimental externa. A 23 do Pescados Rubén Burela FS pasou polo quirófano para un transplante de aloenxerto meniscal externo con prato tibial.
Tras a operación realizada polo traumatólogo Francisco Forriol, a ala brasileira aínda permanecerá uns días no hospital Nuestra Señora del Rosario. Unha vez recibida a alta na clínica madrileña, Cely continuará co proceso de recuperación en Burela, supervisada polos profesionais médicos da entidade laranxa.
O día antes da súa operación, a propia futbolista relataba o novidoso da intervención á que se somete e como afronta este periodo de recuperación logo duns meses que “pasaron muy lentamente”. Agora, para ela, comeza “a conta atrás” para volver ás canchas.
Explica, por exemplo, que de entre o que pode elixir, está “como seguir adiante. Esa foi unha das cousas que sempre tentei facer: seguir, sempre da mellor maneira posible. Dentro de toda a mala sorte do que me ten acontecido aínda creo que, na miña vida, a sorte case sempre estivo do meu lado e espero que así continúe”.
Ver esta publicación en Instagram
