O Celta Zorka Recalvi dominou o seu enfrontamento co Ulla Oil Rosalía ao que rematou por vencer por un tanteo de 77-49. Era o primeiro partido de ambas as dúas escuadras nesta tempada na Liga Feminina 2 (LF2) xa que a primeira xornada adiouse enteira.
Con retraso empezaba tamén este cruce, tal e como informa o Celta Baloncesto na súa web “debido a unha incidencia burocrática. As xogadoras juniors santiaguesas, Marta López e Nerea Liste non puideron ser inscritas no partido, e xunto á baixa de Ana de Matías, constituíron tres importantes baixas para o equipo compostelá”.
As viguesas demostraron desde o arranque do choque que ían a polo triunfo. Fixeron valer a súa experiencia e tiraron de xogo interior. Chiqui Barros pediu un tempo morto co marcador 16-9 buscando serenar o xogo e reordenar o xogo do Ulla Oil Rosalía. Ao final do primeiro cuarto a diferencia para as locais era xa de 20-12.
No segundo cuarto as visitantes entraron máis no xogo e acadou un parcial de 8-0. O Celta Zorka Recalvi, cargado de persoais, empezaba a ter problemas.
Era momento de pararse a pensar e Cristina Cantero solicitou un tempo morto para falar coas súas pupilas. O Celta Zorka Recalvi reaccionou e asinou un parcial de 9-0. A vantaxe das celestes foi medrando aos poucos e ao descanso o partido semellaba encauzado para as locais (40-24).
Co Ulla Oil Rosalía xa vencido a adestradora das viguesas aproveitou para dar minutos a xogadoras menos habituis e gardar folgos para o partido do luns 12 en Marín contra o BAXI Ferrol na Copa Xunta (semifinais).
No cuadro visitante, coas ausencias mencionadas anteriormente, Chiqui Barros tiña unha rotación máis curta e polo tanto as santiaguesas acusaban o esforzo. O final do choque chegouse cun marcador de 77-49 para o Celta Zorka Recalvi diante do Ulla Oil Rosalía
O seguinte retos do Celta Zorka Recalvi, mañá
As viguesas xóganse o luns 12 no pavillón A Raña de Marín ás 18:30 horas o pase á final da Copa Galicia.
Na LF2 o seu seguinte choque será coas pontevedresas do CB Arxil o sábado 17 ás 19:00 horas.
FICHA TÉCNICA
CELTA ZORKA RECALVI (77): Mariona Martín (3), Lucía Fontela (5), Celia García (17), Maja Stamenkovic (18), Marita Davidova (5) – quinteto inicial -; tamén xogaron: Ainhoa Lacorzana (2), Noa Comesaña (4), Florencia Niski (1), Clara Prieto (0), Sara Vidal (0) e Rose Marie Julien (15).
ULLA OIL ROSALIA (49): Sara Corredoira (8), Nuria Choren (5), Sarai Carro (0), Carla García (5), Leticia Soares (11) – quinteto inicial -; tamén xogaron: Paula Rivas (1), Blanca Manivesa (3), Angela González (9), Alba Rama (1) E Clara Riera (6)
PARCIAIS: (20-12) (20-12) (21-10) (16-15)
ÁRBITROS: Adrián Álvarez Alonso e Christian Abalo. Señalaron 24 faltas a Celta Zorka Recalvi e 17 faltas a Ulla Oil Rosalía.
INCIDENCIAS: Partido correspondente á segunda xonada da Liga Femenina-2, grupo A. A primeira xornada adiouse enteira polo que era o primeiro partido para ambas as dúas escuadras. Sen público en Navia.
