Superada a primeira volta da LF Challenge, as galegas do Celta Zorka Recalvi sitúanse na zona media da táboa, ocupando a décima posición con sete vitorias e oito derrotas, tendo un balance de 22 puntos.
As celestes, malia estar actualmente na parte inferior da táboa, non están lonxe dos primeiros postos. O terceiro clasificado, o Hozono Global Jairis, está a seis puntos das galegas, o segundo, o Pacisa Alcobendas, a oito e o líder, o Barça CBS, a nove. Esta é unha mostra da igualdade desta nova competición, que naceu nesta tempada 2021-2022 para promocionar o baloncesto feminino, situándose entre a categoría de ouro, a LF Endesa e a coñecida LF2, que pasou a ser a terceira división.
A primeira volta das celestes
As viguesas, único club galego na competición de prata, teñen aínda pendente xogar contrao NB Paterna, un partido adiado ao 18 de xaneiro. Precisamente, este foi o seu primeiro rival do curso, ante o que caeron por un axustadísimo 66-61. De feito, o Celta tardou en coller ritmo na competición, non conseguindo a primeira vitoria ata a terceira xornada, na que venceron por dous puntos ao Manuela Fundación Raca.
Así comezaría un bo momento deportivo para as galegas, que continuaron vencendo ao Al-Qázeres por un 77-65, ao CAB Estepona por un 70-82 e ao Real Canoe por un 63-51, chegando a subir á sexta praza da clasificación. As celestes coñecerían de novo a derrota ante o Lima-Horta Barcelona (74-69) na sétima xornada, encadeando outro partido perdido ante Jairis (49-64),
Na seguinte xornada, as de Cantero venceron de novo contra o Ardoi, outra vez por só dous puntos, para caer á semana seguinte contra o Recoletas Zamora (72-64). O Akoitia Azpeitia sería o seu seguinte rival, ao que gañarían por un 77-45, volvendo á derrota na seguinte fin de semana, contra o Badalona (54-47).
A xornada 14 deixaba como rival do Celta o Barça CBS, o mellor equipo da categoría, e que tamén derrotaría ás galegas na segunda metade do duelo. No último partido que xogaron as viguesas, o equipo olívico deixou grandes sensacións, vencendo por vinte puntos ao Advisoría Mataró Maresme.
Os ránkings do Celta Zorka Recalvi
Atendendo ás estatísticas do plantel celeste, Davydova é a segunda máxima reboteadora, cunha media de 10,47 por partido, e unha das mellores xogadoras da competición, sendo a MVP celeste e a sexta mellor valorada na liga de prata. A súa compañeira Mulligan é a seguinte no ránking celeste de reboteadoras, cun promedio de 6,57.
Fequiere tamén é unha das mellores apostas do plantel vigués, sendo a segunda mellor valorada entre as galegas, cun promedio de 12,2 créditos valorativos por partido. A fichaxe do Celta está a destacar en varias áreas, pero especialmente desde o tiro libre, onde é a segunda mellor da LF Challenge, cun total de 39 de 45 puntos anotados. Na liña de tres, Mariona Martín é a mellor xogadora, cunha media de acerto do 37,5% nos tiros exteriores.
No apartado das asistencias, a xove Laia Lamana é a mellor celeste, cun total de 50 no que vai de tempada, entrando tamén no top10 da categoría. A barcelonesa ostenta tamén o récord de roubos nun partido na LF Challenge, e é a segunda mellor recuperadora de balóns da división, cun total de 47 en 15 encontros.
Ademais, a adestradora Cristina Cantero tamén pode apuntarse éxitos individuais. Neste mes de decembro, a técnico estivo ao mando da concentración da Selección Española sub17, que prepara ás xogadoras da xeración do 2005 para o Mundial de xullo.
