Remata a mala racha do Celta Zorka Recalvi fóra de casa. Cunha moi necesaria vitoria fronte ao GDKO Ibaizabal cun 59-66 no marcador, as celestes recuperan a súa segunda posición con 12 puntos na clasificación da Liga Feminina 2, só por detrás do invicto Baxi Ferrol.
O encontro prevíase complicado. O GDKO Ibaizabal chegaba invicto e cun triunfo moi abultado ante a AD Cortegada. Pola outra banda, o Celta Zorka Recalvi precisaba gañar despois dunha dura derrota fronte ao Azkoitia Azpeitia ISB. Desta forma, a primeira parte do encontro estivo moi igualada, cunha lixeira vantaxe para as xogadoras locais.
Os primeiros minutos do partido comezaron cun bo xogo celeste seguido dun parón de seis minutos sen anotar, que as xogadoras do Ibaizabal aproveitaron para adiantarse no electrónico cun 10-0. O alto ritmo de xogo mermaba as oportunidades do Celta e as vascas colleron o mando dominando o encontro con Cotano e Molina. A situación cambiou a un minuto da fin do primeiro parcial, cando as galegas reaccionaron e reduxeron as distancias deixando o marcador nun 14-10.
No segundo cuarto as xogadoras do Celta seguiron presionando e grazas ao xogo de Fontela e Coello a vitoria comezou a cambiar de bando. Coa entrada de Peyton Ferris no conxunto vasco o partido volveu a estar moi igualado, con grandes ocasións para ambos equipos. Así, chegou o tempo de descanso cunha lixeira vantaxe de tres puntos para as xogadoras locais.
Un Celta forte en ataque e defensa
Esta pausa sentoulle moi ben ao equipo visitante, que sentenciou o partido no terceiro cuarto. O Celta Zorka Recalvi desfrutou dos seus mellores minutos da tempada con moita fluidez nas anotacións e unha coordinación envidiable en defensa. Desta forma, as celestes lograron impoñerse cun 9-21 a solo un parcial do final.
Con todo, o Ibaizabal non baixaba os brazos e seguiron loitando pola vitoria. Pero a forte defensa viguesa impediu que as vascas volveran adiantarse no marcador. A dous minutos do final, o acerto de Davydova desde o tiro libre e os de Stamenkovic aseguraban os dous puntos para as celestes.
Nos últimos segundos, as xogadoras do Ibaizabal seguiron presionando as galegas para puntuar e as faltas persoales multiplicáronse. Ton todo, as deportistas celestes que adestra Cristina Cantero non perdoaron e unha vez máis fixéronse valer desde a liña de tiros libres.
Cun resultado final de 59-66, as viguesas do Celta Baloncesto Zorka Recalvi volven a casa con dous puntos máis no peto e recuperando a posición de prata na Liga Feminina 2 do basket estatal. A próxima cita deportiva das galegas será xogando na casa. O rival que terán enfornte será nesta ocasión Ausarta Barakaldo. A cita está fixadad para a xornada do domingo, 22 de novembro, e a hora establecidad para o inicio do encontro son ás 12:30 horas.
FICHA TÉCNICA
59) GDKO IBAIZABAL: Laura Marcos (-), Juana María Molina (13), Peyton Ferris (10), Rebeca Cotano (19), Helmi Tulonen (6) -cinco inicial-. Tamén xogaron: Ane Arrien (-), Ana Iruskieta (4), Maiane Aizpurua (-), Elina Koskimies (6) e Joana Cristelo (1).
66) CELTA ZORKA RECALVI: Mariona Martín (3), Celia García (10), Rose Marie Julien (6); Maja Stamenkovic (16), Marita Davydova (11) -cinco inicial-. Tamén xogaron: Ainhoa Lacorzana (12), Noa Comesaña (-), Lucía Fontela (4) e Angela Coello (4).
PARCIAIS: 14-10, 16-17, 9-21 e 20-18.
ÁRBITROS: Aitor Gómez e Jaume Pujol. Sinalaron un total de 14 faltas ao GDKO Ibaizabal e 15 ao Celta Zorka Recalvi.
INCIDENCIAS: Partido correspondente á primeira xornada da Liga Feminina 2 disputado no polideportivo Urreta de Galdako (Vizcaia). Foi adiado en dúas ocasións, a primeira na data orixinal ao non poderse realizar os tests de detección da Covid-19 no arranque da competición, aplazándose a totalidade da primeira xornada de competición. Posteriormente, cando se fixou unha segunda data, tivo que volverse adiar por mor da detección dun positivo no GDKO que motivou o correspondente illamento do rival.
