O Celta Zorka Recalvi xa sabe que competirá na fase de ascenso, pero ten que asegurarse unha boa posición para esta segunda parte da competición. Por iso, o partido desta xornada será fundamental. As celestes xogan contra o segundo clasificado, o Osés Construcción Ardoi, o sábado, 13 de febreiro, ás 19:00 horas.
Navia será o escenario onde compitan estes dous grandes equipos da Liga Feminina 2. O encontro prevese moi igualado, xa que ambos conxuntos están no máis alto da competición e son candidatos ao ascenso.
Dous puntos separan a Ardoi e Celta
Porén, atendendo aos datos da clasificación da Liga Feminina 2, as navarras chegan nunha mellor posición. Con 42 puntos en 23 partidos (un máis que as galegas), o Ardoi sitúase segundo, só por detrás do BAXI Ferrol, con catro derrotas e 19 vitorias. A última delas colleitada na última xornada, ante o Maristas Coruña.
Pola súa parte, o Celta ocupa unha posición peor, pero está nun mellor momento competitivo. As celestes teñen un partido pendente por recuperar, ante a AD Cortegada, e tiveron que interrumpir a competición ligueira pola COVID-19. Pero isto, lonxe de frear ás viguesas, fíxolles volver ás pistas con máis forza.
As xogadoras de Cristina Cantero levan 10 xornadas sen coñecer a derrota, converténdose así no segundo equipo en mellor racha, só por detras das ferrolás. Cun duelo menos disputado que as navarras, o Celta ocupa a terceira posición con 40 puntos.
As viguesas queren a mellor posición para o ascenso
Pero o máis importante, co seu último trunfo acadado, ante a ADBA, as celestes aseguráronse un pase directo á fase de ascenso.
O Celta acada un posto para a fase de ascenso coa súa última vitoria (39-70)
Nesta segunda parte da competición, hai catro grupos. Tres deles están encabezados polos líderes de cada grupo, no caso do A, o BAXI Ferrol. O cuarto estará liderado por un segundo clasificado que será elixido por sorteo. Por iso o Celta, que agora é terceiro, precisa rematar como segundo e superar ao Ardoi.
Os puntos da vitoria na ida quedaron en Navarra
Na primeira volta, as celestes non foron capaces de superar ás navarras na súa casa, e perderon por un axustado 78-74. Precisamente esta derrota marcou o inicio da declive do Celta, que perdeu entón o seu segundo posto en favor do Ardoi.
Pero unha volta despois, as celestes están recuperadas e dispostas a recuperar o seu lugar na clasificación. Para esta oportunidade, as viguesas deberán mellorar a súa defensa para facer fronte ás rotacións visitantes, unha das claves que explican o resultado da ida.
Despois deste partido, o Celta despedirá a primeira fase con dous duelos galegos: o derbi ante o BAXI Ferrol e o derbi A Coruña – Vigo ante o Maristas Coruña. Antes desta xornada final, deberán recuperar o partido coa AD Cortegada, axendada para o 17 de marzo.
O público volve a Navia
Para esta xornada, a afección celeste poderá ver ás súas xogadoras na pista en directo, asistindo a Navia. Ao longo deste venres o propio Celta fará público nas redes sociais como acceder e comprar as entradas para o encontro.
Ver esta publicación en Instagram
