Os partidos de baloncesto con acento galego na LF2 non paran e o seguinte será a cargo do Celta Zorka Recalvi e CB Arxil. Viguesas e pontevedresas citaranse o sábado, 16 de xaneiro, ás 18:30 horas.
Un encontro a priori desigual, xa que ambos conxuntos ocupan posicións moi distintas na táboa. O Celta suma unha racha de tres vitorias que, xunto coas outras 8 que logrou ao longo da tempada, déixaas na quinta posición da clasificación.
A última delas, ante as compostelás do Ulla Oil Rosalía, que fixeron un partido moi digno sobre a pista, pero non lograron frear ás celestes. Malia ser un dos equipos fortes da competición, o Celta descolgouse hai algunhas xornadas do podio da LF2 e equipos de moi alto nivel como Azkoitia Azpeitia, Extremadura Miralvalle ou Osés Construcción Ardoi tampouco fallan e sitúanse por enriba das viguesas, pero sempre por debaixo do BAXI Ferrol.
Pola súa banda, o Arxil disputará o seu terceiro duelo galego consecutivo, tras xogar ante o BAXI Ferrol e o Maristas Coruña. As verdes confían en que a terceira sexa a vencida e logren sumar os dous puntos ante un rival que lles venceu na primeira volta.
Na ida, o equipo dirixido por Maite Méndez logrou dominar parte do partido, ata caer no tramo final por un 62-67. Na pretempada, o partido da Copa de Galicia tamén deixou unha vitoria celeste por un 64-59.
Sabendo isto, o Arxil é consciente de que será un partido duro, principalmente debido á férrea defensa do Celta. Pero as pontevedresas confían no seu plantel, con reforzos como Bineta Ndoye, Sara Castro e Noelia Masiá, ademais das fichaxes de Heather Forster e Natalia López.
Estas xogadoras uniránse ás canteranas Carla Fernández, Cristina Díaz e María Lago, que levan máis dunha década vestindo a camisola verde e seguen sendo a columna vertebral do equipo.
Ainhoa Lacorzana, baixa nas filas do Celta
Cristina Cantero non poderá contar para este duelo galego coa xogadora Ainhoa Lacorzana. A celeste está en proceso de recuperación dunha lesión pola que se viu obrigada a operarse do ligamento. O resto do conxunto do Celta estará sen problemas ás ordes de Cantero.
O partido, que se disputará no pavillón de Navia, celebrarase a porta pechada, seguindo as recomendacións sanitarias. Con todo, poderá seguirse como de costume a través do streaming do Canal FEB.