O parón por mor dos positivos en COVID-19 detectados no Celta Zorka Recalvi non foi motivo suficiente para frear as celestes que xa reclaman voltar ao máis alto da LF2. O seu seguinte partido será ante o HGB Ausarta Barakaldo, o domingo, 21 de febreiro, ás 12:30 horas.
As vascas poderán ser as oitavas vítimas das viguesas, que non dan tregua e xa son o segundo equipo coa mellor racha competitiva, sempre por detrás do todopoderoso BAXI Ferrol.
O Celta leva seis trunfos logrados de maneira consecutiva, vencendo a conxuntos da zona baixa, como o Arxil, da media, como o Adareva, ou a rivais directos, como o Miralvalle.
Pola contra, o seu rival para esta 21ª xornada da Liga Feminina 2 está a pasar por un momento complicado deportivamente. Xunto cos dous peores equipos da categoría, o Barakaldo é o cadro con peor racha competitiva, acumulando tres derrotas seguidas.
As vascas perderon ante o Maristas Coruña, BAXI Ferrol e Ardoi, e leva case un mes sen coñecer a sensación de vitoria, cando venceu á ADBA.
O Celta venceu comodamente na ida
Outro factor a favor das celestes está no antecedente do partido de ida. No encontro disputado a finais de novembro, as viguesas venceron en casa por máis de vinte puntos, cun resultado final de 75-54.
Naquela oitava xornada, o Celta Zorka Recalvi soubo repoñerse dun desastroso primeiro cuarto, para dominar nos tres seguintes e asentar a vitoria.
Neste duelo destacou Celia García, unha das mellores entre as celestes, que cargou co peso do seu equipo asinando 29 puntos e liderando ás viguesas hacia o trunfo. A súa gran actuación mereceuller ser a MVP deste encontro.
