O Celta Zorka Recalvi segue colleitando bos resultados que os sitúan na segunda posición, a terceira virtualmente polos partidos aprazados. Con só dúas derrotas, as viguesas acumulan xa 14 puntos, a dous do líder, o Baxi Ferrol. O último triunfo foi contra o HGB Ausarta Barakaldo, cunha diferenza de 21 puntos.
O encontro comezou truncado para as celestes. As xogadoras viguesas fallaron fronte á canasta no primeiro cuarto, perdendo así moitas oportunidades de adiantarse no marcador. A boa defensa do Barakaldo desconcertaba ás locais, aínda que as vascas fallaban nas faltas persoais.
Cun 9-13 ao fin do primeiro parcial era o tempo para que o Celta reaccionase. E así foi. No segundo cuarto as celestes colleron o mando do partido e soamente Uchendu no equipo rival deulles problemas ás viguesas. Despois dunha pausa, o Barakaldo retomou a forza para loitar polo resultado, aínda que non foi suficiente, e o Celta xa ía gañando ao descanso cun total de 32-27.
Tras o descanso, o Celta afirmou a súa superioridade e sentenciou o partido. Cun terceiro cuarto no que foron imbatibles, e con dous triples consecutivos como colofón, o electrónico marcaba xa un 26-13 a favor das locais. Unha distancia que non deixou de aumentar no que restaba de encontro.
O último tempo deixaba xa pouca marxe para a sorpresa vasca. A entrada de Florencia Niski para o Celta, que case non desfrutou de minutos nos anteriores partidos, sumada á actuación de Stamenkovic, afundiu o xogo do Barakaldo. As dúas xogadoras celestes asinaron un 10-0 que aumentou ata o 17-14 final. A bocina soou cun luminoso que marcaba un merecido 75-54, deixando os dous puntos en Vigo.
Celia García foi clave para a vitoria do Celta
Na primeira parte do encontro, Celia García foi clave no xogo celeste e asinaba xa 14 puntos. Ao rematar o partido, García foi declarada MVP con 33 puntos de valoración tras anotar 29 tantos e lograr 7 rebotes, no que foi o seu mellor partido nunha competición da FEB.
A baloncestista acumula un total de 117 puntos nesta tempada, o que a converte na máxima anotadora do seu equipo e na sétima da competición atendendo á media por partido. García é ademais das xogadoras mellor valoradas desta Liga, cunha media de 16,38 puntos por partido e está no top 10 de xogadoras con mellor porcentaxe de tiro.
FICHA TÉCNICA
75) CELTA ZORKA RECALVI: Mariona Martín (3), Celia García (29), Rose Marie Julien (7), Maja Stamenkovic (11), Marita Davydova (7) -cinco inicial-. Tamén xogaron: Ainhoa Lacorzana (6), Noa Comesaña (-), Lucía Fontela (-), Florencia Niski (8), Clara Prieto (4), Sara Vidal (-) e Angela Coello (4).
54) HGB AUSARTA BARAKALDO: Laura Chahrour (6), Aina Martín (9), Alexis Lewis (12), Nicole Murugarren (11), Bintou Lo (4) -cinco inicial-. Tamén xogaron: Aitana Vergara (2), Eva Ortega (-), Emma Karamovic (6), Alba Ibáñez (2) e Ijeona Uchendu (2).
PARCIAIS: 9-13, 23-14, 26-13 e 17-14.
ÁRBITROS: Cristian Martín Vázquez e Iris Feijoo Díaz. Sinalaron un total de 19 faltas ao Celta Zorka Recalvi e 18 ao HGB Ausarta Barakaldo.
INCIDENCIAS: Partido correspondente á oitava xornada da Liga Feminina 2 disputado no polideportivo do complexo municipal de Navia, en Vigo, sen público.
