Durante a celebración da Cea do Deporte da Coruña, que terá lugar hoxe sábado 25 de xuño no Palacio dos Deportes de Riazor, homenaxearase a Irene Martínez, do Club Halterofilia Coruña, Juan Copa, adestrador do Hockey Club Liceo, e ao colexiado Carlos Cortés. Tamén se recoñecerá a Purificación Fernández Casal, a usuaria máis lonxeva das Escolas Deportivas Municipiais coruñesas.
O Palacio dos Deportes de Riazor acollerá a Cea do Deporte, unha cita histórica do calendario da cidade que levaba un tempo se celebrarse e coa que se pon o peche á tempada de actividades nas Escolas Deportivas Municipais.
A alcaldesa da Coruña, Inés Rey, asistirá a Cea do Deporte recuperada este ano polo Goberno municipal tras sete anos de ausencia, co obxectivo de poñer o colofón ao curso das Escolas Deportivas Municipais e homenaxear o traballo e traxectoria dos deportistas e entidades máis destacados do municipio. Será, en definitiva, unha noite de festexos para poñer en valor o dinamismo e actividade do tecido deportivo local.
Irene Martínez, 13 títulos en 14 anos
Neste sentido, e xa nos prolegómenos da cea, ás 21.45 horas, terá lugar a entrega de galardóns. En primeira instancia premiarase a Irene Martínez Santiago, atleta do Club Halterofilia Coruña que se proclamou campioa de España de halterofilia en 59 kg., acadando o seu décimo terceiro título en 14 anos.
A continuación, e xa na categoría que recoñece ao mellor adestrador, homenaxearase ao coruñés Juan Copa, á fronte do Hockey Club Liceo que se proclamou campión da OK Liga 2021-22 a semana pasada.
Ademais, e na categoría que recoñece ao mellor xuíz ou árbitro, Inés Rey entregará o premio ao colexiado Carlos Cortés Rey, que nesta tempada superou o medio milleiro de encontros arbitrados na Liga ACB de baloncesto.
Tamén haberá tempo para homenaxear a un clásico do fútbol da cidade, o Sin Querer, que recibirá unha mención especial polo centenario da fundación do clube. De seguido, e xa para rematar, a alcaldesa entregará dúas mencións especiais a Purificación Fernández Casal e Jesús López Castaño, dous dos usuarios máis lonxevos das Escolas Deportivas Municipais.
A Cea do Deporte celébrase o día antes do Día do Deporte na Cidade
A Cea do Deporte comezará arredor das 21.30 horas e será presentada pola xornalista coruñesa Leticia García Chas. Será, ademais, a antesala dunha xornada moi especial no contexto do calendario deportivo coruñés: este domingo, as rúas da Coruña acollerán o Día do Deporte na Cidade, con case setenta actividades programadas entre cinco enclaves: a pista deportiva de Durmideiras; os xardíns de Méndez Núñez; a Cidade Deportiva de Riazor; a praza de Tabacos, na contorna da Palloza; e a praia de Oza.
O Día do Deporte na Cidade celebrarase en horario de mañá (11.00 a 14.00 horas), e de tarde (16.00 a 19.00 horas), coa participación de máis de setenta entidades deportivas e sociais da cidade da Coruña.
