A Copa Galicia de Ciclocrós 2021 rematou despois de catorce xornadas en Ponteareas, na primeira edición do Ciclocrós Borja Gómez Méndez. Alí, a ciclista Isabel Castro, do Condado Bike, liderou o ránking elite gañando na competición.
A vitoria de Castro foi dobre, ao ser a mellor na carreira elite sub23 e na júnior. Competindo na súa casa, a ciclista do Condado Bike, cun tempo de 45 minutos 48 segundos, impúxose por 11″ de vantaxe á júnior Sofía Álvarez e por 28″ á sub23 Andrea García (Academia Postal-Abanca). O triunfo da ponteareá outorgoulle o título na xeral elite da Copa Galicia.
Segundo apuntan desde a Federación Galega de Ciclismo, as diferenzas tamén foron escasas na proba de ciclocrós elite-sub23 masculina. Saúl López e Samuel González protagonizaron un cara a cara que se decantou por 15″ a prol do monfortino do Maceda. O elite do Academia Postal-Abanca obtivo a súa segunda vitoria absoluta da temporada cun rexistro de 58:39 nun circuíto entretido, revirado e esixente, mentres que a segunda praza do vigués do Máis Que Bicis serviulle para conquistar o ranking elite da Copa igualado a puntos con Rubén Deaño (Ourense Termal). A terceira posición en Ponteareas correspondeu ao elite Luis Fernández Oliveira (Avanza-O Porriño), que bateu ao esprint ao vencedor sub23 Anxo Carril (Coruxo).
As vencedoras do I Ciclocrós Borja Gómez Méndez
A nómina de gañadoras e gañadores do I Ciclocrós Borja Gómez Méndez compuxérona nove ciclistas máis: Lorena Patiño (Compostelano) e Manuel Alonso (Os Esfola Arrós) en cadetes; Ricardo Buba (Coruxo) nos juniors; Eva Ortega (Biciosos Rías Baixas) e Roberto Rodríguez (Bicicletas Chinquena) -levándose o esprint pola vitoria que disputou con Miguel Porto (Ponteareas)- en máster-30; Rocío Blanco (A Forna) e Xacob Agra (Ponteareas) en máster-40; Óscar González Bastos (Máis Que Bicis) nos máster-50; e Manuel González Ojea (Bici O Con) nos máster-60.
Os premios desta xornada de ciclocrós entregáronos a alcaldesa Cristina Fernández Davila; o concelleiro de Deportes, Miguel Bouzón; o presidente do Club Ciclista Ponteareas, Manuel Gregores; o padriño deste evento Borja Gómez Méndez; e o presidente da Federación Ciclismo Galego, Juan Carlos Muñiz.
Ver esta publicación en Instagram
Coroación en Maceda
Unha vez disputadas as catorce probas da Copa só resta a coroación final das líderes e dos líderes das súas clasificacións. Esta cerimonia, segundo apunta a Fedearción, terá lugar o domingo en Maceda, coincidindo coa celebración nesta localidade ourensá do Campionato de Galicia, última cita da temporada autonómica de ciclocrós.
Os resultados da última xornada unicamente provocaron variacións nas táboas elites. O resto dos ránkings tiveron como vencedoras e vencedores a María Filgueiras (Río Miera) e Tomás Pombo (Cambre-Caeiro) en cadetes; a Laura Mira (Supermercados Froiz) e Ricardo Buba en juniors; a Carla Fernández (Team Farto-BTC) e Miguel Rodríguez (Supermercados Froiz) en sub23 e nas táboas absolutas; a Eva Ortega e Jonathan Sousa (In Situ) en máster-30; a Rocío Blanco e Andrés Calvete (Monte Xalo) en máster-40; a Sonia Costoya (Corbelo) e Antonio Sousa en máster-50; e a Antonio González (Salvaterra) nos máster-60.
