Palma de Mallorca acolleu o Campionato de Natación Absoluto de Inverno en Piscina de 25 metros, ao cal acudiron seis nadadoras galegas, entre as que destacou Carla Carrón. A deportista do CN Arzúa foi campioa nos 400 e nos 800 libre.
Xunto a ela competiron Paula Otero, do CN Arteixo, Rosalía Marín, do CN Coruña, Alicia Bouzas, do CN Galaico, Ana Cernadas, do C. Fluvial de Lugo e Sofía Carballo, do CN Ponteareas. Entre elas sobresaíron Marín, quen bateu a mellor marca galega de 16 anos, Cernadas, que estableceu varios novos Récords Galegos e Carballo, que tamén superou a MMG de 15 anos.
Ouro para Carrón na primeira xornada
A nadadora Carla Carrón triunfou xa na primeira xornada, proclamándose campioa de España absoluta na proba de 400 libre cun tempo de 4:07.55 establecendo unha nova Mellor Marca Galega de 16 anos.
A do Arzúa non volvería a competir ata a terceira xornada, cando seguiu ampliando os seus éxitos batendo dúas veces a mellor marca galega de 16 anos na proba de 200 libre, nas eliminatorias cun tempo de 1:59.62 e na final A de novo con 1:59.50. Rematou acadando o sétimo posto.
Finalmente, na cuarta e derradeira xornada, Carrón acadou o seu segundo título, nesta ocasión na proba de 800 libre cun tempo de 8:25.34.
Outros éxitos galegos
Rosalía Marín, do CN Coruña, competiu na segunda xoranda en 50 costas, onde bateu a MMG de 16 anos na final B, cun tempo de 28.72 acadando o posto 11. No seguinte día de competición, a bolseira do CGTD acadou o posto 11 en 200 costas con 2:13.37. No derradeiro día, Marín acadou o posto 16 en 100 costas con 1:02.62.
Ana Cernadas, do Fluvial de Lugo, bateu o Récord Galego de 200 costas na final A cun tempo de 2:11.69. Nas eliminatorias matinais xa batira a MMG de 17 anos con 2:12.97. Na cuarta xornada, esta bolseira do CGTD bateu por dúas veces o Récord Galego na proba de 100 costas. Nas eliminatorias acadou un tempo de 1:01.71 que lle valeu a clasificación para a final B, e na xornada de tarde de novo con 1:01.18 acadando o décimo posto.
Pola súa banda, Sofía Carballo González, do C.N. Ponteareas, bateu por dúas veces a MMG de 15 anos na proba de 100 braza. Nas eliminatorias matinais con 1:11.60 e na final B da tarde con 1:10.94 acadando o posto 12, posición que repetiu nos 200 braza.
Paula Otero, do CN Arteixo, foi cuarta na proba de 400 libre con 4:08.95 na primeira xornada. Na segunda foi décima en 200 bolboreta con 2:15.22. Ao terceiro día, rematou 15ª en 200 libre con 2:01.11 e tamén se clasificou para a final B en 200 estilos con 2:20.37. O último día foi sexta en 800 libre con 8:40.42.
Paula Otero: “Ver pasar aos olímpicos ao meu carón pareceume unha pasada”
Finalmente, Alicia Bouzas, do C.N. Galaico e bolseira do CGTD, rematou 13ª en 400 estilos con 4:55.89.
