Estiveron preto de logralo, pero a Selección Española de baloncesto, coas galegas Raquel Carrera e Tamara Abalde quédanse ás portas das semifinais olímpicas. O combinado español perdeu por un 64-67 ante Francia nos cuartos de final.
Desta forma, as dúas xogadoras galegas e o resto das súas compañeiras despídense dos Xogos Olímpicos de Toquio 2020 co orgullo de ter loitado ata o último minuto ante un rival fortísimo como as galas.
España soñou coa remontada
Nos primeiros compases do encontro, as españolas dominaban o xogo. A intensidade deste encontro de alto nivel foi en aumento co paso dos minutos, igualando o nivel das contrincantes.
Os primeiros puntos foron para a Selección, pero antes da fin do primeiro cuarto as francesas reaccionaron para situarse por diante no marcador. No segundo parcial, o guion seguiu polo mesmo camiño, cunha Francia potente e segura en ataque. Porén, as españolas non deixaron escapar a oportunidade de iniciar a remontada, e chegaron ao descanso a escasos puntos das galas.
Na segunda metade, puido desfrutarse na pista nipona dun partido moi rifado. Nos primeiros minutos tras o paso por vestiarios, as francesas sairon máis fortes, pero as vermellas (desta vez de branco) non deixaron que as súas rivais se escaparan no electrónico.
Francia seguía por diante, pero as españolas mantiñan os brazos en alto para loitar polo pase ás semifinais. No último cuarto, España soñou coa vitoria. A Selección volveu a colocarse por diante, pero as galas botaron por terra as aspiracións hispanas, no último minuto, afianzando o seu triunfo. Cun axustado 64-67 final, as españolas despídense de Toquio.
Neste derradeiro partido olímpico, a ourensá Raquel Carrera disputou un total de 10:37 minutos, anotando dous puntos para o equipo español. Pola súa banda, Tamara Abalde non saltou ao parqué toquiota por decisión técnica.
Podes revivir a retransmisión da FIBA do partido aquí:
FICHA TÉCNICA
ESPAÑA (64): Cristina Ouviña (11), Silvia Domínguez (7), Alba Torrens (10), Laura Gil (4), Astou Ndour (16). Tamén xogaron: Laia Palau, Maite Cazorla (12), Raquel Carrera (2), Queralt Casas (2) e María Conde (4).
FRANCIA (67): Endene Miyem (9), Sandrine Gruda (6), Sarah Michel (2), Gabby Williams (11), Alix Duchet (8). Tamén xogaron: Marine Fauthoux, Alexia Chartereau (4), Helena Ciak (1), Valeriane Vukosavljevic (4), Iliana Rupert (4) e Marine Johannes (18).
PARCIAIS: 16-21, 14-15, 18-19 e 16-12.
