- Carral será o único municipio da provincia da Coruña e unha das cinco únicas localidades galegas (xunto a Lugo, Sanxenxo, Ribadeo e Viana do Bolo) que acollerán este verán o Campus do Atlético de Madrid.
A Casa do Concello de Carral viviu, esta mañá, a presentación da actividade a cargo do alcalde, José Luis Fernández Mouriño, do edil de Deportes, Óscar Bodelo, do presidente da Unión Deportiva Carral, Alfredo Méndez Barbeito, de Borja Gestal, da U.D. Carral, e do coordinador do campus en Galicia, Borja Collar Amado.
Durante a súa intervención, o edil de Deportes destacou “ou orgullo que supón para Carral contar con actividades deportivas destas características e impulsadas por entidades de recoñecido prestixio non panorama nacional”, como Atlético de Madrid.
O campus está dirixido a nenos e nenas de entre 5 e 16 anos e desenvolverase entre o 29 de xuño e o 4 de xullo no campo municipal Borja Rodríguez. As actividades celebraranse de luns a sábado, en horario de 9.30 a 14.00 horas.
Adestradores do Atlético de Madrid
Ao longo da semana, os participantes realizarán adestramentos específicos, sesións de tecnificación e mellora individual, alén de diferentes actividades lúdicas. O programa incluirá tamén a visita de adestradores da Academia do Atlético de Madrid.
Unha programación completa coa que se busca un claro obxectivo: fomentar a aprendizaxe e a diversión durante o período estival, utilizando o fútbol como ferramenta para transmitir valores entre os máis novos.
Ao finalizar o Campus do Atlético de Madrid, os participantes recibirán un diploma acreditativo, equipamento oficial e distintos recordos vinculados ao club madrileño.
A cota xeral de inscrición será de 235 euros. Os antigos participantes poderán beneficiarse dunha tarifa reducida de 220 euros, mentres que o prezo para socios da U.D. Carral e para irmáns de asistentes de edicións anteriores será de 210 euros.
As persoas interesadas poderán formalizar a súa inscrición a través do formulario web habilitado pola organización desta actividade que acollerá o concello coruñés de Carral.
