O BM Porriño anuncia a fichaxe da central Carolina Bono

• Carolina Bono: “Temos o nivel suficiente para pelexar polos postos de arriba”
• Ismael Martínez: “Cremos que con Caro equilibramos moitísimo o equipo”

A central Carolina Bono é a cuarta fichaxe que o Conservas Orbe Rubensa BM Porriño anunciou para a nova campaña na liga Guerreras Iberdrola.

A arxentina de 21 anos formouse no equipo arxentino SAG Villa Ballester. Con 19 anos decidiu vir a xogar a España no Balonmán Bolaños, onde estivo media tempada. Na tempada pasada militou no Club Balonmano Elche.

Carolina Bono é unha habitual dentro das convocatorias das categorías inferiores da Selección Arxentina de balonmán.

A xogadora decidiu fichar polo club porriñés ao ver a oportunidade de crecer como xogadora “gústame o proxecto pensado para esta tempada. Creo que é un lugar onde podo aprender moitísimo e ao falar coa directiva do club antes de fichar transmitíronme moitísima confianza”.

Con respecto a esta nova tempada a nova deportista do Conservas Orbe Rubensa BM Porriño ten unhas expectativas moi altas: “a verdade que vendo os adestramentos e partidos que tivemos ata o momento teño as expectativas moi altas. Creo que temos o nivel suficiente como para pelexar polos postos de arriba”.

Carolina Bono, fichaxe do Conservas Orbe Rubénsa BM Porriño, tras xogar o primeiro amistoso: “Tiven sensacións moi boas. É verdade que os equipos cos que xogamos son dunha división menor, pero estes partidos sérvennos para afianzarnos, entendernos mellor e levarnos boas sensacións de fronte ao comezo da tempada. Estou moi contenta co equipo”

“Tiven sensacións moi boas. É verdade que os equipos cos que xogamos son dunha división menor, pero estes partidos sérvennos para afianzarnos, entendernos mellor e levarnos boas sensacións de fronte ao comezo da tempada. Estou moi contenta co equipo”, puntualizou a central arxentina tras disputar esta pasada fin de semana o Torneo Concello de Mos.

Isma Martínez di de Carolina Bono: “Ten unha proxección moi grande”

O técnico do primeiro equipo porriñés, Ismael Martínez, destacou a gran proxección que ten a nova fichaxe do Conservas Orbe Rubensa BM Porriño: “ten unha proxección moi grande. É unha xogadora que é internacional en categorías inferiores da Selección Arxentina e a verdade que destaca moito na súa xeración”.

“Tal e como entendemos nós o xogo, necesitamos xogar sempre con central e a verdade que nos últimos anos só tiñamos unha central pura en persoal e iso estábanos sendo un hándicap grande cando Anthia lesionábase ou necesitaba descanso”, explicaba Ismael Martínez e engadía que a incorporación da central arxentina é de gran axuda “cremos que con Caro equilibramos moitísimo o equipo”.

Ismael Martínez, adestrador do Conservas Orbe Rubensa BM Porriño: “Tal e como entendemos nós o xogo, necesitamos xogar sempre con central e a verdade que nos últimos anos só tiñamos unha central pura en persoal e iso estábanos sendo un hándicap grande cando Anthia lesionábase ou necesitaba descanso”

Na parte técnica o adestrador do primeiro equipo do Conservas Orbe Rubensa BM Porriño destacou: “é unha xogadora con moi bo un contra un. Ademais, ten moi bo lanzamento en apoio. O único que temos que traballar con ela un pouco é o tema físico”.

Por último, Ismael Martínez concluíu: “estamos moi contentos con ela. É unha xogadora que entende moi ben o xogo e creo que entendeu moi ben o que buscamos con ela”.