Hai xa tempo que por motivos xornalísticos tiña que recompilar información para dar conta dunha competición de karate que tiña lugar nas Pontes. Á procura de fontes, todas as persoas coas que falaba repetían coma un mantra: “Fala con Carmiña. Cóntacho ela todo”.
Eu, que aínda non tivera contacto con Carmen Barro, tiven claro dende antes incluso de falar con ela que era unha muller resolutiva, disposta e accesible. Os que me remitiron a ela daquela estaban no certo. Ao outro lado do teléfono atopei unha muller resolutiva, capaz, que tiña todas as respostas que precisaba e que me axudou moitísimo a levar a cabo con éxito o meu traballo informativo.
Carmiña emanaba ilusión, paixón e coñecemento do que falaba: deporte e karate. Pero ademais sumáballe algo fundamental que agradecín enormemente: trato próximo, disposición a sumar sempre e humanidade. Todo iso, pese a ser, xa daquela, todo un nome propio no deporte galego.
Botando un ollo á súa mensaxe de benvida na Federación Galega de Karate pódese ver que a miña experiencia persoal con Carmiña non foi unha casualidade. Era unha actitude vital.
Logo de ter sido elixida por terceira vez consecutiva como máxima responsable federativa do karate galego falaba de valores como a modestia ou a humildade. Falaba da cortesía como unha virtude que quería inculcar á mocidade. Pero tamén da “paciencia para tratar os asuntos de todos con todos”. Outra das cuestións ás que aspiraba era ter “valentía para defender os intereses da FGK con enerxía”.
Carmen Barro Pita: “No karate, asegúrovolo, non hai, nin pode haber, sexos, tan só vocación e moito traballo”
Con todo, nese saúda que aínda hoxe aparece pendurado na páxina web da federación, hai un parágrafo final que non ten desperdicio. Di así: “Son muller, pero non presidenta por selo, nin tampouco por criminalizar de xeito oportunista ao home ou á muller ou facelos avergoñarse da súa masculinidade ou feminidade cando estas non son opresoras nin nocivas. No karate, asegúrovolo, non hai, nin pode haber, sexos, tan só vocación e moito traballo”.
