A alcaldesa, Inés Rey, e a concelleira de Deportes, Mónica Martínez, recibiron esta xornada no Pazo Municipal de María Pita, na Coruña, o regatista Tony Ripoll e os atletas Mauro Triana e Carmen Sánchez.
A recepción aos deportistas, que veñen de acadar importantes logros candanseu na súa respectiva disciplina, tivo lugar no salón de plenos de María Pita. A e os deportistas homenaxeados polo concello herculino foron a atleta Carmen Sánchez, subcampioa de España na proba de xavelina nos recentemente celebrados 100 Campionatos de España Absolutos ao aire libre; o regatista Tony Ripoll, que a pasada fin de semana se proclamou en Cádiz campión absoluto de España da clase 420; e o atleta Mauro Triana, ouro no Campionato de España na proba de relevo 4X100.
A rexedora coruñesa felicitou a deportista e os deportistas polos seus éxitos e destacou o compromiso do concello co mundo do deporte. Un compromiso que se reflicte no feito de que o Goberno local que preside Inés Rey sexa o primeiro na cidade que crea unha concellería dedicada exclusivamente ao deporte.
Inés Rey, alcaldesa da Coruña: “Os valores do deporte son os valores dunha cidade que respira solidariedade, esforzo, compromiso e ilusión por medrar”
“O deporte é un dos alicerces da nosa política, o deporte fai cidade”, dixo Inés Rey, quen tamén quixo subliñar o papel decisivo que xogan as familias no triunfo duns deportistas que levan por todo o mundo o nome da cidade, que son protagonistas da marca Coruña.
Segundo apuntou a alcaldesa da Coruña na recepción: “Os valores do deporte son os valores dunha cidade que respira solidariedade, esforzo, compromiso e ilusión por medrar”.
Pola súa banda, a concelleira de Deportes, Mónica Martínez, deulles os parabéns aos tres deportistas, “a tres campións que dun xeito ou outro representan a esta cidade que se sente orgullosa deles”.
Martínez sinalou que o concello e a sociedade son conscientes das dificultades que están a ter o deporte e as/os deportistas nesta situación de incerteza que provoca a pandemia que estamos a vivir, o que fai, dixo, que estes triunfos que veñen de conseguir sexan aínda máis meritorios.
A Prata para Carmen Sánchez en xavelina
A asturiana de nacemento pero afincada en Galicia dende fai varios anos Carmen Sánchez lograba no seu último lanzamento no concurso de xavelina no Campionato de España ao aire libre 2020 unha meritoria medalla de prata con 45.24 m. Así logrou reeditar o mesmo metal do ano pasado e conseguido para Galicia o quinto e definitivo metal que a comunidade galega acadou destos campionatos. Neses cinco estaba tamén o de Mauro Triana que tamén estivo na recepción en María Pita.