A atleta asturiana, fincada na Coruña desde fai máis dunha década, Carmen Sánchez Parrondo Menchu, proclamouse o pasado sábado 24 de febreiro en Jaén, Campioa de España Absoluta de janzamento de xavelina. A deportista acadaba o título no transcurso do Campionato de España de Lanzamentos Longos que se levou a cabo na localidade andaluza.
Este título estatal para a avilesina é un auténtico premio á constancia. Carmen Sánchez Parrondo Menchu adicase ao deporte desde que era unha nena. Esta atleta é Graduada en Ciencias da Actividade Física e o Deporte, e estableceuse na Coruña en 2015, para adestrar co ex xavalinista internacional coruñés Raimundo Fernández Necho, agora adestrador estatal, e director técnico do Club Lanzadores Coruña.
Tal e como contan desde o seu club “os inicios non foron fáciles, pois Carmen Sánchez Parrondo Menchu tivo que compatibilizar os seus adestramentos con longas xornadas de traballo desde que chegou á Coruña, apostando polo seu futuro deportivo e laboral nesta cidade. Pero ademais, Menchu arrastraba unhas molestias no seu ombreiro lanzador, que non a deixaban adestrar e competir con normalidade. As probas médicas iniciais non terminaban de acertar coa orixe do problema, pero o certo é que non conseguía achegarse ao seu mellor rexistro de 53,68 metros realizado en 2011, ata que por fin diagnosticóuselle unha lesión de SLAP no ombreiro, que a obrigaron a pasar polo quirófano en febreiro de 2017″.
Regreso á competición de Carmen Sánchez Parrondo
Tras unha dura e longa rehabilitación, en 2018 Carmen Sánchez Parrondo Menchu regresou á competición, superando de novo os 50 metros. Na Nucía 2019, xa conseguía proclamarse subcampioa de España, cunha nova mellor marca persoal de 53,78 metros.
“Posteriormente, outra lesión, esta vez na súa columna vertebral, puxo en perigo a súa continuidade no deporte de competición, sobre todo para unha disciplina tan explosiva e esixente para as costas como é o lanzamento de xavelina. Lonxe de renderse, esta galega de adopción, con sangue asturiano, continuou firme, reclamando menos trabas, apoio, e facilidades para poder seguir cos seus adestramentos na Coruña. Seguindo un concienzudo plan de readaptación, continuou subindo ano tras ano ao podium estatal absoluto, ata sumar nada menos que dez medallas (seis platas e catro bronces) no seu historial”, relatan desde o Club Lanzadores Coruña.
Ver esta publicación en Instagram
Tras 6 pratas e 4 bronces, por fin, chega o ouro para Menchu
Faltáballe a Menchu só o ouro, que estivo máis preto que nunca o ano pasado, cando tras unha brillante tempada, Carmen Sánchez Parrondo presentouse no Campionato de España de Torrent 2023 no seu mellor momento de forma. Alí, e a pesar de sufrir unha forte gastroenterite vírica na noite do venres, o sábado volveu mellorar o seu récord persoal ata 54,24 metros, que lle deron o subcampeonato.
“Así, tras sacarse o Máster en Educación en 2023, curso que aproveitou para facerse co título de Campioa de España Universitaria, a Tempada 2024 presentábase prometedora deportivamente para Menchu, pois reducira un pouco o seu horario laboral, para centrarse na preparación de oposicións a ensino secundario, deixándolle algo máis de tempo para os seus adestramentos, e sobre todo, con menos fatiga física para realizalos”, detallan desde o Club Lanzadores Coruña.
Desde entón só afrontou dúas competicións. Dunha parte o Campionato Galego de Lanzamentos Longos o 2 de febreiro en Lugo, onde conseguiu unha nova mellor marca persoal de 54,61 metros. E esta fin de semana o Campionato de España de Lanzamentos Longos en Jaén, onde Menchu foise ata 53,93 metros, que lle serviron para colgarse do pescozo o ansiado ouro, e que auguran maiores logros para todo o que aínda resta de Tempada.
Campionato de España de Lanzamentos Longos en Jaén dúas atletas máis do Club Lanzadores Coruña tomaron parte. Alí estiveron a xavalinista Paula Piñón Sureda, que ocupou finalmente o sexto lugar con 43,71 metros, e a discóbola María Ezquerro Fernández, que foi décima con 42,82 metros.
Neste mesmo concurso a cubana-galega Yulenmis Aguilar (que se atopa en trámites para a concesión da nacionalidade española) lograba un lanzamento de 63.90 m. que supoñen a mellor marca mundial do ano.
