Unha expedición do Mecalia Atlético Guardés foi recibida no Pazo Provincial de Pontevedra pola presidenta da Deputación, Carmela Silva, que estivo acompañada do deputado provincial de Deportes, Gorka Gómez. Por parte do club, acudiron Jesús López, presidente da entidade; José Ignacio Prades, adestrador do primeiro equipo; Abel González, segundo adestrador da primeira escuadra, así como coordinador da canteira; as capitás Marisol Carratú e Lorena Pérez; e a directiva María José Alonso.
A máxima mandataria do ente provincial destacou ás xogadoras como “unhas cracks” e púxoas de exemplo para “visibilizar que as mulleres son capaces de converterse en verdadeiras heroínas”. Carmela Silva lembrou que é unha obrigación da Deputación“ apoiar ou deporte e particularmente ó deporte feminino, xa que é un elemento fundamental para construír sociedades mellores”.
Carmela Silva, presidenta da Deputación de Pontevedra, díxolle ás xogadoras do Mecalia Atlético Guardés: “Sodes unhas craks, e un exemplo para visibilizar que as mulleres son capaces de converterse en verdadeiras heroínas”
Carmela Silva di que irá á Sangriña a “poñerme a camiseta con vós”
Ademais, manifestou as súas ganas de “sentir ou deporte de preto” e asegurou aos representantes da entidade alí presentes que se achegará aos primeiros partidos na Sangriña para “poñerme a camiseta con vós”. Carmela Silva desexou ao equipo que manteña os éxitos da anterior tempada e mostrouse consciente da necesidade de apoio. “ Contade con nós”, expresou, á vez que lembraba a Fran Teixeira, falecido onte, como figura “imprescindible do noso balonmán”.
Pola súa banda, o presidente Jesús López recolleu a luva e devolveuno. “Este soño tan bonito que temos non sería posible sen o apoio da Deputación”, reflectiu. “Estamos orgullosas de levar a provincia de Pontevedra por toda Europa”, engadiu.
José Ignacio Prades, adestrador do Mecalia Atlético Guardés, tamén se mostrou agradecido ao ente provincial: “O apoio que nos brinda a Deputación é moi importante. Quero poñer en valor o traballo da directiva e, sobre todo, das xogadoras, que teñen moi difícil superarse cada ano, pero sempre dan máis do que teñen”.
Unha destas xogadoras, a capitá, expresou o seu “orgullo” por representar a esta provincia. Marisol Carratú afirmou que o equipo sente “o agarimo da xente” alá onde vai. “Tentaremos estar á altura. Estamos a dalo todo para devolvelo. Queremos plasmar o traballo na pista e conseguir logros. Especialmente no noso pavillón, que ten un clima único”, concluíu a meta arxentina.
