A galega Alicia Fernández, que milita no SCM Ramnicu Valcea, é unha das 18 guerreiras convocadas polo seleccionador estatal, Carlos Viver, para xogar no Preolímpico de Llíria á procura da clasificación de España para os Xogos Olímpicos de Tokyo 2021.
O preolímpico disputarse na ocalidade valenciana de Llíria, do 19 ao 21 de marzo. As seleccións rivais de España serán: Suecia, Senegal e Arxentina. Os catro combinados estatais loitarán por unha das dúas prazas que dan acceso aos Xogos Olímpicos deste ano. No caso de España, sería a terceira cita olímpica consecutiva para as Guerreiras.
A convocatoria de Carlos Viver, na que está integrada a deportista galega Alicia Fernández, está formada pola seguintes 18 xogadoras:
- Portaría | Silvia Navarro (Rocasa Gran Canaria), Mercedes Castellanos (Rincón Fertilidad Málaga), Darly Zoqbi (Gloria Bistrita 2018)
- Central | Nerea Pena (Team Esbjerg), Alicia Fernández (SCM Ramnicu Valcea)
- Lateral esquerdo | Ivet Musons (Elche Visitelche.com), Lara González (ES Besançon), Carmen Campos (JDA Dijon Handball)
- Lateral dereito | Mireya González (SCM Ramnicu Valcea), Almudena Rodríguez (Gloria Bistrita 2018), Irene Espínola (Neckarsulmer)
- Extremo esquerdo | Jennifer Gutiérrez (Borussia Dortmund), Soledad López (Rincón Fertilidad Málaga)
- Extremo dereito | Carmen Martín (CSM Bucaresti), Marta López (SCM Ramnicu Valcea)
- Pivote | Ainhoa Hernández (Zubileta Evolution Zuazo), Lysa Tchaptchet (Elche Visitelche.com), Eli Cesáreo (Super Amara Bera Bera)
Hai catro novidades na lista con respecto ao Europeo
Tal e como explican desde a Federación Española de Balonmán, de cara a este Preolímpico en Llíria, “o seleccionador nacional introduce catro novidades con respecto ao Campionato de Europa que se disputou o pasado mes de decembro en Dinamarca: Darly Zoqbi en portaría, Irene Espínola no lateral dereito, Ivet Musons no lateral esquerdo e Eli Cesáreo no pivote”.
A gardameta de orixe brasileira regresa ás Guerreiras para unha gran cita tras colgarse a medalla de prata no Campionato do Mundo de Xapón 2019, do mesmo xeito que Cesáreo, que tras superar unha lesión de longa duración e perderse o Campionato de Europa volverá á dinámica da selección neste Preolímpico.
En canto a Ivet Musons, conta desde a RFEBM que este preolímpico “será a súa primeira actividade co combinado nacional tras case tres anos, debido ás lesións que sufriu neste intervalo de tempo e que lle frearon a súa progresión. Medalla de ouro nos Xogos Mediterráneos de Tarragona 2018, supón unha gran noticia ver á xogadora do Elche Visitelche.com de novo ao máximo nivel, algo que chamou a atención de Carlos Viver para incluírlle na lista de 18 xogadoras. Por último, Irene Espínola xa participou o pasado mes de novembro na preparación para o Campionato de Europa en Torrelavega”.
Carlos Viver: “Chegou o momento da verdade”
O seleccionador estatal das Guerreiras, Carlos Viver, sinala a tenor desta convocatoria para o Preolímpico de Llíria que “chegou o momento da verdade, o Preolímpico é un torneo de máxima esixencia sexa cal for o rival porque en tres partidos e tres días xógasche estar no evento máis importante que poidas vivir como deportista, e por iso todas as seleccións imos pór a máxima intensidade, concentración e ganas. Desde o primeiro momento levo tentando mandar esta mensaxe a todo o mundo, estamos moi contentos de xogar en casa, en Llíria, unha cidade envorcada connosco, pero tamén hai que ser conscientes de que hai moito en xogo”.
Respecto das novidades introducidas con respecto ao pasado Campionato de Europa, Carlos Viver, destaca que “levamos unha base de xogadoras que traballan desde hai moito tempo na contorna da selección, con experiencia, xunto a algunhas que regresan como Ivet Musons ou Eli Cesáreo tras lesión; son xogadoras con experiencia en torneos internacionais de gran nivel como Mundiais ou Europeos, e volven nunha cita transcendental como esta para axudar ás Guerreiras a lograr a clasificación para Tokio”.
