Esta fin de semana “quero gañar aínda que sexa inxustamente”. Pero ao final da tempada, “oxalá esteamos os dous na Ok Liga”. O que fala é Carlos Loureiro, adestrador do HC Deportivo Liceo que mañá, domingo 25 de abril, enfróntese ao HC Borbolla nun duelo herculino con moita rivalidade. Este curso as liceístas volven atacar o seu retorno á elite do hoquei sobre patíns feminino español. Alí queren tamén estar as coruñesas ás que se enfrontan.
Esta fin de semana toca derbi e xa se sabe que na Coruña esta modalidade conta cun sinfín de seareiras e os duelos locais vívense cunha intensidade máxima. Pódese asegurar que haberá motísima rivalidade, e que aínda que sexa competitividade da boa, fará subir a adrenalina.
O tecnico das verdibrancas non sabe se as tomatitas de Monte Alto (que teñen partido o día antes na Ok Liga) se gardarán as súas xogadoras de Prata para afrontar este duelo herculino, pero estean na cancha ou non, o preparador do HC Deportivo Liceo cre que a súa mente non estará ao cento por cento no partido co CP Vilanova e si no derbi. “Non sei se reservarán xogadoras no partido de Ok Liga para o partido contra nós na Ok Liga Prata, pero teño claro que a súa cabeza estará no partido do domingo”.
E seguramente o entrenador coruñés non vai desencaminado, por que o partido no que as de Santi Martínez se xogan realmente a vida é no duelo de rivalidade local coas liceístas.
Carlos Loureiro ten ben estudiado ao HC Borbolla e do seu rival desta fin de semana di que conta “cunhas xogadoras que teñen medrado moito este ano xogando na Ok Liga. Se miramos os seus partidos na máxima categoría non teñen case goleadas. As xogadoras galegas colleron moitísima experiencia. Nótaselles moito máis asentadas. Creo que o problema do HC Borbolla neste curso na Ok Liga foron esos primeiros partidos de adaptación. O salto das xogadoras de autonómica a estatal nótao calquera. Se non fose por iso, estou convencido de que se tiñan salvado”.
O xogo do HC Deportivo Liceo está baseado unha zaga forte e segura, así como un hoquei elaborado nas xogadas de ataque. “Defensivamente somos moi fortes”, di Carlos Loureiro. “Temos a portaría moi ben cuberta e custa facernos ocasións. Logo gústanos optar polo xogo combinativo. Contar cunha boa gardameta é fundamental. O hoquei a patíns é un deporte onde é doado marcar goles, polo que se tes unha cancerbeira que sabes que vai responder é importantísimo”.
Consultado polo seu prognóstico para o resultado do derbi coruñés de hoquei, o adestrador do conxunto liceísta, non se atreve a dar un resultado, pero si traslada un desexo a xeito de brincadeira: “Eu o domingo quero gañar aínda que sexa inxustamente”, bromea. Polo que si aposta Carlos Loureiro, é “por que os dous equipos da Coruña esteamos o vindeiro ano na Ok Liga. Confío no ascenso dos dous”.
Para Galicia sería xenial ter dous equipos na Ok Liga”, di o técnico liceísta
O adestrador local confía e espera que o seu rival desta fin de semana acompañe ao seu equipo no ascenso á máxima categoría do deporte, un xesto que lle honra e que manifesta coa mira posta no futuro do hoquei sobre patíns feminino en Galicia.
“Considero que temos posibilidades de ascender os dous equipos. Tanto o HC Borbolla, coma nós, non temos nada que envexarlle aos dous equipos de Madrid. Calquera de nós os dous podemos ascender. Para Galicia sería xenial contar con dous equipos na máxima categoría”. E no que atinxe á economía e a loxística dos clubs, como apunta o técnico “sería un desprazamento menos”.
Pero onde máis pon o acento Loureiro é que sería unha moi boa “ocasión de que saian novas rapazas da canteira”. O entrenador do HC Deportivo Liceo asegura que “o HC Borbolla demostrou este ano na Ok Liga que hai canteira. Tiveron mala sorte”, pero di que é “necesario que as xogadoras máis novas vexan que poden saír e subir de categoría, como pasou hai anos co hoquei masculino. Agora detectamos que hai moita demanda de xogar ao hoquei sobre patíns entre as rapazas”.
Das palabras do adestrador liceísta pódese inferir que se cadra estamos nun punto de inflexión no hoquei rodado galego feminino. Un deses momentos que adoitan ser cruciais para o despegue dunha modalidade entre dunha xeración de deportistas nun ámbito concreto, neste caso: Galicia.
Carlos Loureiro: “O noso obxectivo é ascender”
Coa mirada máis aló do partido desta fin de semana o preparador das coruñesas do HC Deportivo Liceo, explica que o ascenso “é o obxectivo que se nos marcou deste o comezo. Sabemos que vai ser complicado pero a meta é esa. O club deunos todos os recursos que precisásemos. Agora tócanos a nós cumplir”, di con rotundidade e sen escapar da responsabilidade que se infiren das súas verbas.
Na súa análise das posibilidades de subir á Ok Liga feminina desde a categoría de prata, Carlos Loureiro argumenta: “Nesta campaña estamos catro equipos moi igualados: CP Alcorcón, CP Las Rozas, HC Borbolla e nós”.
De volta coa mirada no duelo coruñés desta fin de semana, o entrenador do HC Deportivo Liceo apunta que, se a esa igualdade de capacidades de xogo e plantillas, “lle sumas que este partido é un derbi, a igualadade medra”.
Para o adestrador do conxunto verdibranco o duelo desta fin de semana é “un deses partidos que se xogásemos un tras outro, en bucle, en cada ocasión podería gañar un equipo distinto. O que non teño dúbida é que ser á un partido moi bonito para ver”, vaticina o preparador das galegas.
Para aquelas persoas que non teñan a sorte de poder ser unha das 60 afortunadas que presentaciarán ese partido en vivo, velaí unha solución vía streaming da man de Hockey Global.
✅ STREAMING | O #DeportivoLiceo 🆚 @HockeyCBorbolla será retransmitido en directo por @hockeyglobal.
📆 Domingo 25, 18:00h.#OKPlataF pic.twitter.com/WaY4d7dtwY
— Hockey Club Liceo (@HockeyclubLICEO) April 22, 2021
