Ao Durán Maquinaria Ensino quédanlle tres partidos para finalizar a primeira fase da Liga Feminina Endesa, e neles se xoga o pase aos play offs. A primeira bala que terán as de Carlos Cantero será este sábado, 20 de marzo, ás 19:00 horas, ante o Kutxabank Araski.
Para afrontar esta semana frenética, na que as lucenses xóganse estar na loita polo título, precisamente esta posibilidade de entrar nos play offs é o que ocupa a mente de plantel e corpo técnico. “Tiramos de que queda pouco e co play off como principal motivación para que a cabeza tira máis que as pernas, sabendo a importancia do partido de Araski e de Zamora e algo menos do de Valencia“, sinala Cantero.
Primeira proba para o Ensino: o Araski
Esta fin de semana, o Ensino terá enfronte a un rival vasco acomodado na zona media da táboa, e un equipo “moi rápido, con moito talento individual por fóra”, en palabras de Carlos Cantero.
Segundo o adestrador das lucenses, o cadro local depende moito das súas postes, malia contar “con xogadoras moi boas no un contra un, como nos lanzamentos de tres”.
Deste encontro, o adestrador agarda un partido de ritmo alto, que convén máis ao Araski, por ter xogadoras que “chegan en tiros rápidos, transicións, contraataques”, das que destaca a Quevedo, Brown, Asurmendi e Izaskun.
Carlos Cantero: “(No Araski) teñen xogadoras de moi alta calidade anotadora”
Ante isto, Cantero considera que a clave do partido estará en frear ás rivais desde o tiro de tres. Tamén advirte que non hai que deixarse guiar polas baixas cifras anotadoras das vascas, xa que “teñen xogadoras de moi alta calidade anotadora”.
Por outra parte, ambos conxuntos chegan con sensacións distintas. As xogadoras do Ensino veñen de gañar ao Al-Qázeres, dando un paso adiante para estar nos play offs, mentres que o Araski caeu derrotado por un 81-57 ante o SPAR Girona.
O partido do desempate
O Araski está empatado a puntos coas lucenses. Ambos conxuntos manexan 40 puntos, se ben as galegas están dous postos por riba grazas ao average ao seu favor e cun partido menos que o Araski.
Esta lixeira vantaxe acadada no encontro de ida, no que as de Cantero venceron por un axustadísimo 70-67. Un average ao seu favor mínimo, polo que o adestrador asegura que “non é algo que nos obsesione, nin ao que lle teñamos que prestar moita atención. É coma se fose un partido 0-0”.
As lucenses tocadas
Neste partido de ida, Merritt Hempe foi unha das protagonnistas, pero non estará presente na segunda volta. A xogadora está en proceso de recuperación, “pero aínda non está para adestrar co equipo en cancha nin fixo contacto”, indica o seu adestrador.
Por iso, para o duelo do sábado, Cantero indicou que probaran a que xogue uns minutos para ver as súas sensacións.
Carlos Cantero: “As xogadoras que estiveron moi ben no partido de ida, non poderemos contar con elas. Por aí pasa a dificultade deste partido”
Esta medio baixa preocupa ao adestrador, xa que “as xogadoras que estiveron moi ben no partido de ida, non poderemos contar con elas, ou todo o que nos gustaría. Por aí pasa a dificultade deste partido”.
Tamén se atopa con complicacións Natalie Van den Adel, que está recuperándose dos síntomas da COVID-19. “Aínda lle custa adestrar, pero pouco a pouco vai facendo máis partes dos adestramentos, aínda que non completos”, explica o técnico.
Quen si estará previsiblemente é Vega Gimeno, a segunda máxima anotadora do cadro lucense e a española mellor valorada da competición. Precisamente, a súa gran tempada mereceulle dúas candidaturas aos premios da LF Endesa.
Sobre estes galardóns, Cantero non se mostrou moi a favor, por ser “premios individuais e sen ter rematada a tempada”. Aínda así, cre que a candidatura de Gimeno é “moi merecida”, ao que engade que “me falta Stanacev no posto de base”.
