O Durán Maquinaria Ensino de Cantero inicia esta semana o camiño polo título de campioas da Liga Feminina Endesa e o fará nun partido no que se respira a rivalidade. As lucenses recibirán ao Valencia Basket o xoves, 1 de marzo, ás 19:00 horas (Teledeporte).
Este é un encontro moi esperado nas filas lucenses e o seu adestrador, Carlos Cantero, admite que “temos unha motivación e unhas ganas incribles de xogar o partido pero conscientes da dificultade”, xa que considera que as taronjas son o favorito do play-off.
Carlos Cantero, admite: “temos unha motivación e unhas ganas incribles de xogar o partido pero conscientes da dificultade”
Con 59 puntos á fin da primeira fase, o Valencia Basket quedou segundo sendo o equipo en mellor momento, cunha racha de 17 vitorias consecutivas. Pola súa banda, o Durán Maquinaria Ensino pasou ao play-off como sétimo clasificado, cun balance de 15 vitorias, e 15 derrotas e 45 puntos.
Como vencer ao Valencia segundo Cantero
O Durán Maquinaria Ensino coñece xa ao Valencia Basket de preto e ten fresco na memoria o encontro de volta da competición regular. Neste partido, as lucenses foron superiores na primeira metade, perdendo enerxía nunha segunda parte marcada, segundo o adestrador, pola arbitraxe. Con esta derrota aínda a flor de pel, a motivación é extra para a ida de cuartos.
Porén, malia que o seu equipo foi superior nos primeiros 20 minutos da ida e a volta de liga, Carlos Cantero considera que aínda non lle ten collida a medida ás laranxas. O que si ten claro é que, para evitar que o Valencia Basket faga dano, será clave “evitar un ritmo alto de xogo e evitar que corran”.
O adestrador do Durán Maquinaria Ensino considera que de cara a esta parte da copmetición deben mellorar “o tema de perdas de balón en ataque, e non deixalas correr cómodas en defensa”
Non hai mellor forma de aprender que da experiencia, e en base a enfrontamentos anteriores, o técnico considera que deben mellorar “o tema de perdas de balón en ataque, e non deixalas correr cómodas en defensa”.
No relativo ao formato da competición, Carlos Cantero considera que “todo é favorable para o equipo favorito. Independentemente de que sexa ao mellor de dous ou tres partidos e con average sempre está feito para que ao final sexa o favorito o que pase. Aínda así está ben que o primeiro partido sexa na casa e poidamos competir ao máximo para ver que pasa no segundo”.
A motivación como clave para o Ensino
Para este encontro, o adestrador das galegas, Carlos Canterom terá a todas as xogadoras do equipo á súa disposición, xa que Merritt Hempe volverá previsiblemente ás pistas. Segundo declara o técnico, a xogadora contará xa con minutos neste partido, aínda que ten pendente retomar o contacto nos adestramentos. Malia estar entre algodóns, Carlos Cantero conta con ela “porque é un partido de play-off e porque queda moi pouco xa”.
Carlos Cantero explica que se vai contar con Merritt Hempe: “porque é un partido de play-off e porque queda moi pouco xa”
En xeral, o plantel do Durán Maquinaria Ensino chega “canso, pero mentalmente ben, sabendo que nestes partidos o tema mental supera ao tema de pernas e lesións e con moitas ganas por xogalo”. Entre as súas xogadoras, do último partido ante o Quesos El Pastor destaca a Marta Blanco sobre a que se declara “consciente de que ela pode rendir así e moi contento da súa mellora ao longo da tempada”.
Precisamente neste último encontro fixeron algunhas probas “para ver como se axustaban elas de cara a plantexar cousas novas agora no play-off“, e admite que “seguramente volvamos a xogar con Bea Sánchez de 5″.
