Unha vez rematada a aventura na Copa da Raíña, o Durán Maquinaria Ensino ten todos os sentidos postos en afrontar a fase final da liga. O equipo de Carlos Cantero ten só tres partidos por diante, pero o adestrador admite que ese sexa “quizais o momento no que máis curtas de efectivos estamos”.
Manténdose na sétima posición, as lucenses reciben ao Al-Qázeres en casa, o penúltimo clasificado que se está xogando nesta fase final o seu futuro na Liga Feminina Endesa.
Así chega o Ensino
Pola súa parte, o Ensino ocupa a sétima posición, pero Cantero sinala que están “bastante curtas de efectivos”. Ás baixas rotacións se engaden as dificultades para adestrar con normalidade polas xogadoras que están tocadas. “Chegamos moi xustas”, admite o técnico.
Carlos Cantero: “Chegamos moi xustas”
Os play off están cada vez máis lonxe e para chegar a eles o cadro lucense necesitaría case un pleno de vitorias. “Somos conscientes, pero tamén somos realistas”, declara sobre este aspecto Cantero.
O adestrador prefire centrarse en preparar os adestramentos “o mellor posible”, para chegar fortes aos partidos. Mentres siga este panorama, declara Cantero, “non podemos pensar máis alá, como están a facer os equipos da nosa competencia. Temos este hándicap, e temos que sumir este reto”.
E así ve Cantero ao rival
Enfronte terán a un rival con dificultades para gañar e que se xoga non descender. Porén, ao non ter disputado a Copa, as extremeñas tiveron máis tempo para descansar e preparar esta nova xornada.
Por iso, “fisicamente chegan mellor que nós”. Ademais, en contra do Ensino xoga a neceisdade do Al-Qázeres de sumar os dous puntos. “Elas se xogan unha das últimas bazas para saír dos postos de descenso e iso me preocupa máis quizais que si existe moita igualdade para o acceso a play off”, declara.
Carlos Cantero: “Elas se xogan unha das últimas bazas para saír dos postos de descenso e iso me preocupa máis quizais que si existe moita igualdade para o acceso a play off”
Independentemente destas adversidades, as galegas irán a pola vitoria e, para iso, preferirían un partido cun ritmo alto de xogo. De novo, a escasez de efectivos provoca unha incerteza sobre se as xogadoras serán capaces de manter tal ritmo.
Ante esta situación, Cantero sinala que o plan pasa por “adaptarnos ben á situación, asegurar rebotes e cometer poucos fallos e poñer a intensidade no aspecto defensivo”.
Este foi o aspecto que fallou no partido de ida, no que o Ensino volveu a casa cunha derrota. Segundo a análise do adestrador, o principal erro das galegas estivo na defensa invidivual. Así, para este novo duelo, “todo pasa por recuperar a nosa capacidade defensiva no 1 contra 1 e nos exteriores e botar aí a intensidade que lle podamos dar o partido, a nivel defensivo sobre todo”.
Natalie Van den Adel aínda arrastra síntomas da COVID-19
Entre as desgrazas que sofre o Ensino, quizais a peor sexa o estado físico de Natalie Van den Adel. A xogodaroa contaxiouse de COVID-19 despois dunha concentración internacional e aínda arrastra as secuelas.
A alero retomou os adestramentos, pero “é coma se estivera adestrando a 6.000 metros de altura, fáltalle osíxeno, é incapaz de facer ondadas ou esforzos de máis de 40 segundos. Ao día seguinte non recupera ben e a súa capacidade pulmonar está moi danada”, lamenta o adestrador.
Carlos Cantero (sobre Van den Adel): “A súa recuperación xa sabiamos que ía ser moi lenta, déulle a COVID moi forte”
Por iso, sinala que é perigoso que adestre máis e contará con ela para pequenas rotacións no próximo partido. “A súa recuperación xa sabiamos que ía ser moi lenta, déulle a COVID moi forte e aínda ten restos de capacidade pulmonar que afectan a unha deportista de rendemento en alto grado. Intentaremos pensar nela para os últimos minutos de cada cuarto e gañar esa rotación e ver que podemos facer”.
Cantero recorda que a baloncestista ten moitas ganas de voltar á pista, pero as secuelas da COVID-19 son moi perigosas, así que “hai que controlala ao detalle”.
O público estará en casa
Como contrapunto positivo, a afección do Ensino poderá voltar ao Pazo. “Esta é a noticia máis positiva”, subliña o adestrador.
Para este encontro as persoas aboadas poderán acceder ao partido, “algo que botamos de menos toda a tempada”. Cantero recorda a importancia do público, xa que “nós adicámonos a isto por eles e é unha alegría para o equipo, o staff e o club e así o queremos demostrar coa súa chegada ao pavillón”.
O lado positivo da participación en Copa
Este reencontro coa afección sucederá tras a derrota colleitada en Copa ante o Perfumerías Avenida. Un partido que as lucenses non foron quen de controlar, pero do que saen contentas pola súa actuación.
“Dimos unha boa imaxe e incluso o último cuarto conseguimos gañalo. O equipo non saíu desmoralizado, saímos fortes desde partido. Fisicamente jorobadas, pero animicamente ben”, resume Cantero.
De feito, a nivel psicolóxico, o técnico mantén que da “un punto de motivación extra”, para poder afrontar este final de tempada.
