A semana próxima, o Durán Maquinaria Ensino estreará a Copa da Raíña, pero antes de pensar en como superar ao Perfumerías Avenida, as lucenses teñen compromiso ligueiro. A cita será ante o Campus Promete este sábado, 27 de febreiro, ás 12:00 horas en Logroño.
Xa o advirte o adestrador Carlos Cantero: “A prioridade é Campus Promete e despois xa verá Salamanca e a Copa”. Coa competición regular a piques de rematar, no Ensino seguen loitando por rematar o máis alto posible, nunha metade superior moi competida.
Con 25 partidos xogados (tendo pendente o encontro ante o Valencia), as galegas suman 37 puntos e ocupan a sétima posición. Empatadas con elas está o Cadi La Seu, o rival ao que venceron na anterior xornada.
Con 38 puntos, un máis que as lucenses, atópase o Lointek Gernika Bizkaia e con dous máis, 39, están Ciudad de la Laguna Tenerife e Movistar Estudiantes.
Porén, o rival para esta 27ª xornada de Liga Feminina Endesa ocupa unha posición moito máis inferior. No posto 13 sitúase o Campus Promete, un equipo que debe seguir pelexando por salvar a categoría. Ante o Ensino tentarán deixar atrás un mal momento deportivo que as deixa como o segundo conxunto en peor racha, con cinco derrotas consecutivas.
Os rebotes, punto forte do Campus Promete
Unha das claves no xogo local desta xornada está nos rebotes. As rioxanas son un dos mellores clubs nesta área, sendo o máis destacado en rebotes defensivos e estando entre os catro primeiros en rebotes totais.
Carlos Cantero: “(Diarra) é unha xogadora determinante pola altura, envergadura e capacidade reboteadora”
O técnico do Ensino recorda que no plantel local xogadoras como a base Flores e a poste Diarra son fundamentais. En especial esta última, que é “unha xogadora determinante pola altura, envergadura e capacidade reboteadora”.
Nas filas galegas tamén deberán atender á liña de tres, onde baloncestistas do Campus Promete como Nogic ou Paula Estebas destacan seguindo á súa compañeira Alarcón, a máis efectiva de toda a categoría desde a liña de triplo.
As lucenses están en boa forma
Cantero asegura que, “mentres non se xoguen dous partidos semanais”, o equipo está ben. Non será necesario dosificar forzas e minutos de cara á Copa, xa que con só un duelo por semana “o equipo aguanta ben as cargas e non hai problemas salvo os golpes que poidan aparecer adestrando”.
Ademais, coa chegada de Helena Oma o banco do Ensino ampliouse e Cantero móstrase moi contento coa súa incorporación. “É unha xogadora que non comete erros e, como ela di, os seus minutos dependen de aprenderse o book táctico e dar o máximo en defensa”, comenta o adestrador.
Precisamente na liña defensiva é onde está un dos seus fortes, “xa sabiamos que aporta moito nese aspecto”, confesa o técnico.
Carlos Cantero: “Necesitamos que todas as xogadoras aporten e sumen, cando algunha non está a botamos de menos e non conseguimos tan claramente unha vitoria”
Porén, Cantero quere recordar a importancia de que todo o seu plantel estea ao 100% para poder sumar de dous en dous. “Somos un equipo no que necesitamos que todas as xogadoras aporten e sumen, cando algunha non está a botamos de menos e non conseguimos tan claramente unha vitoria”, recorda.
O Ensino estrea patrocinador
Entre as boas novas que rodean ao Durán Maquinaria Ensino está tempada está a incorporación dun novo patrocinador. La Cimbali, marca de máquinas de café para bar ven de asinar un acordo de patrocinio co club lucense para o que resta de tempada e a próxima.
Neste sentido, o adestrador confesou descoñecer os termos do convenio, pero móstrase alegre pola aportación. “Alégrome de que se sigan sumando patrocinadores ao proxecto e que o equipo siga consolidándose neses postos de Liga Feminina, que sexa un equipo de Liga Feminina con maiúsculas. Alégrome de que se sumen empresas e confíen en nós para axudar ao equipo”.
