Faríase raro ver o número nove da camiseta do Arxil noutra xogadora que non sexa Carla Fernández. Facendo honra a ese dorsal, a base cumprirá a súa undécima tempada no club pontevedrés, co que acumula xa máis de 300 partidos de liga, aos que hai que sumar as copas Galicia e os amigables.
Trátase dunha xogadora fundamental nos esquemas de Maite Méndez nas últimas tempadas. Esta viguesa de nacemento e pontevedresa de adopción chegou a Pontevedra procedente do Carmelitas no curso 2010-2011 e desde entón fíxose co agarimo da afección verde, especialmente pola súa calidade, o seu carácter gañador e, sobre todo, o compromiso que ten co Arxil, xa que en moitas ocasións xogou con molestias ou mesmo lesionada e sempre estivo dispoñible para o equipo.
A pasada tempada xogou 737 minutos na liga regular, anotando 222 puntos, con 89 rebotes recolleitos, 60 balóns recuperados, 81 asistencias e unha valoración de 193 en 21 partidos. A súa progresión é indubidable e a súa achega imprescindible.
Carla Fernández foi gañando minutos de xogo e responsabilidade no equipo co paso das tempadas e nestes dous últimos anos, a parte da súa faceta ofensiva e de directora no xogo, foi un baluarte a nivel defensivo. Destaca especialmente a súa mellora nos tiros de tres, co 30% de acerto, e nos roubos de balón, sendo a segunda mellor recuperadora da liga cunha media de 2,86 e segunda mellor en asistencias cos 3,86.Aos poucos vaise formando o armazón do Arxil para a tempada 2020-21.
Base: Carla; escolta: Natalia; beirado: Noelia; á- pivot: Cristina e Margarita e pivot: Foorster e Bineta.
