Novo duelo galego na División de Honra Prata. Esta vez a cita do balonmán disputarase o sábado (15 de febreiro, ás 18.30 horas) no pavillón municipal de Carballal. Os rivais serán o Carballal e o Lavadores. Por parte das de Redondela, o SAR Rodavigo viaxan a comunidade veciña para acadar novamente dous puntos moi importantes ante o Balonmano Gijón.
As do Rubensa Porriño descansarán este fin de semana posto que o seu rival, o Lanzarote Puerto del Carmen xogará a segunda fase da Copa da Raíña. O partido queda aprazado ata o mes de marzo, concretamente o día 14.
Segundo duelo galego na Prata: Carballal-Lavadores
O pavillón de Carballal acolle a cita do balonmán galego da Prata o sábado —15 de febreiro, ás 18.30 horas—. Un Carballal cunha racha de tres encontros invitos recibe sobre a súa pintura a un CdeC Lavadores que é noveno empatado a puntos coas galegas do Rodavigo e o Rubensa Porriño. Ademais levan dous partidos perdendo sendo o último no duelo galego ante as de Redondela.
“Desde Carballal esperamos seguir sumando puntos para que pouco a pouco nos acheguen aos equipos máis altos. A vitoria da xornada anterior foi moi importante”, comentou Javier Castro, o adestrador do Carballal, para As Nosas. Por parte do Lavadores, o seu adestrador, Anxo Otero dixo para este medio que “o equipo segue traballando” a pesar de que “deixaran escapar a oportunidade de gañar o fin de semana pasado”.
Pero ambos saben que un duelo é un duelo. Castro apunta que os afeccionados teñen unha “motivación especial aparte da típica rivalidade que pode existir entre ambos equipos”. As xogadoras coñécense moi ben por iso, entrevistamos a Inés López e a Uxía Ferreiro porque elas estiveron no plantel dos dous equipos.
“Penso que o Carballal é un equipo que leva moitos anos xogando xuntas con moita experiencia na categoría. Pode gañarlle a calquera xa o demostrou a semana pasada ante o líder“, analizou Otero sobre o rival. Contan coas mesmas baixas e un par de xogadoras que son dúbida.
No partido de ida da competición, o Lavadores levouse a vitoria pos dous goles. “Xogounos unha mala pasada. Saben moi ben cando subir e baixar con esa intensidade tanto en defensa como nas transicións e marcan moi ben a diferenza controlando mellor os tempos de partido”, dicía sobre o rival, Castro. Para esta cita seguen tendo as mesmas baixas pero contan tanto con xuvenís e con xogadoras da Liga Autonómica.
DATOS DE INTERESE
DÍA E HORA: 15 de febreiro, ás 18.30 horas.
CAMPO: Pavillón Municipal de Carballal – Vigo.
ÁRBITROS: Julio Villanueva Pérez e Pablo Álvarez Vázquez.
INCIDENCIAS: Partido correspondente a xornada 20 a División de Honra Prata no que enfrontará ao A.D. Carballal contra o CdeC Lavadores no Pavillón Municipal de Carballal.
O SAR Rodavigo busca sumar dous novos puntos en Xixón
O SAR Rodavigo enfróntase este fin de semana —o domingo 16 de febreiro, ás 12.00 horas— ante o Balonmano Gijón no pavillón de La Tejerona. As de Redondela son oitavas con catro vitorias consecutivas, sendo a última no duelo galego ante o Lavadores.
As xixonesas están máis abaixo con 10 puntos e levan dous partidos gañando. O último ante o Palencia Turismo. “Trátase dun rival directo que se xoga moito neste partido xa que unha vitoria faríalle seguir no bo camiño cara a permanencia na categoría”, comenta Elisardo González, o adestrador do Rodavigo, para As Nosas.
As redondelás atópanse nunha semana complicada. Teñen catro baixas que non estarán na cita e non “lles permitiu adestrar coa intensidade que deberían”. A pesar desta anomalidas as nosas xogadoras “están con moitas ganas e intentaremos acadar dous novos puntos que lles daría a tranquilidade para competir o que resta de tempada”. Na xornada sete, as de Rodavigo impuxéronse por un 28 a 19 no electrónico.
DATOS DE INTERESE
DÍA E HORA: 16 de febreiro, ás 12.00 horas.
CAMPO: Pavillón Municipal da Tejerona – Xixón (Asturias).
ÁRBITROS: Santiago Piñera Fombona.
INCIDENCIAS: Partido correspondente a xornada 20 a División de Honra Prata no que enfrontará ao Balonmano Gijón contra o SAR Rodavigo no Pavillón Municipal da Tejerona.
