Xuventude, boa proxección e, sobre todo, ilusión. Estas son as características que poderían resumir as novas fichaxes do CRAT Residencia Rialta que, neste ano tan excepcional, volve á Primera División de Honor cun plan diferente.
Maica Martí, Paz Marín, Miriam Roig, Paula Requena e Elena Martínez son algunhas das caras novas que poderán verse por Elviña esta tempada. Ante a incerteza deste curso, desde o CRAT apostaron por fichaxes coa vista posta no futuro, en lugar de facer grandes inversións para este ano.
A maior parte das novas incorporacións son xogadoras xoves, que veñen a estudar ao campus de Elviña, na Coruña, e fichadas coa intención de que queden durante máis tempadas no conxunto herculino. “Decidimos invertir en futuro, en xuventude e toda esa ilusión de xente que ven e ir armando un equipo con visión a medio – longo prazo. É un ano de transición”, explica Helen Roca, técnico do conxunto coruñés.
As novas fichaxes
En palabras da adestradora do conxunto herculino, estas novas caras “aportan esa ilusión por formar grupo neste ano no que precisamente parece que todas estamos nos nosos micromundos a nivel persoal”.
Ademais, son xogadoras de alto nivel. A que conta con maior experiencia é Paula Requena, que é internacional e chegou ao club galego “encantada” co proxecto. “Ao non haber clasificación para as Olimpiadas coma noutros anos, non tiña moito sentido que seguise en Madrid, así que estivmos atentas e propusémoslle vir”, relata Roca. Polo resto, son xogadoras que están na proxección internacional. Maica Martí, por exemplo, é unha das máis seguidas polos olleadores.
As que repiten
Entre as xa veteranas, repiten nomes como Paula Medín Alevín, Mónica Mona Castelo, Elsa Porto, Ale Fernández ou Carla Mosquera.
Un plantel moi completo, de máis dunha treintena de xogadoras cuxo obxectivo, al menos para este ano de “transición”, é o de desfrutar do deporte oval e formar grupo.
As xogadoras con máis experiencia no club seguen comprometidas coas cores e, a pesar da dificultade da situación excepcional provocada pola pandemia, seguirán unha tempada máis defendendo ao CRAT.
“É unha das cousas desta tempada, creo que é super valente xogar este ano e estar aí. Creo que coa seguridade que hai non imos ter problema pero, se hai algunha vez que teñamos que quedar na casa, si nos vai fastidiar un pouquiño máis. Ter que facer corentena 30 personas é unha barbaridade”, sinala a adestradora.
Podes consultar o plantel completo que competirá esta tempada en Elviña nesta ligazón.
Un CRAT internacional
O talento do plantel do CRAT traspasa as fronteiras de Elviña. Nas filas do club coruñés ata tres xogadoras son internacionais: dúas veteranas, Paula Alevín Medín, capitá das Leonas, e Mona Castelo, e tamén unha recén incorporada, Paula Requena.
As xogadoras da Selección Española disputaron o partido das ‘Estrellas Iberdrola’ contra as mellores xogadoras da competición estatal. Do bando das Estrellas estaba outra coruñesa, Judith Hernández. Esta promesa do rugby feminino está tamén baixo a atenta mirada dos seleccionadores.
Ver esta publicación en Instagram
Unha experiencia que, ao respetar as lesións, aporta moito ao conxunto herculino. “Todo o que sexa ter xogadoras que teñen experiencia internacional fai que o ritmo aumente no resto do equipo. Tiran de ti, tanto nos adestramentos como nos partidos. Aquí non estaríamos acostumadas senón fose porque saen a competir con xente que lles esixe máis. O nivel que hai fóra de España é brutal”, explica Helen Roca.
As xogadoras dos combinados estatais son un exemplo para o resto. Pero non todos os clubs teñen a súa propia internacional. Por iso, e para fomentar o rugby feminino, creouse a campaña Yo seré Leona, da que varias xogadoras do CRAT forman parte como madriñas e o propio club solicitou a súa propia.
