- As competicións dependentes da RFEF que aínda non comezaron, farano esta fin de semana a excepción das de base provinciais e locais que teñen previsto o seu inicio para o 11 de abril
Finalmente son preto de 2.500 os equipos que volverán competir de forma oficial esta tempada en fútbol, fútbol sala e fútbol gaélico, todas elas modalidades dependentes da RFEF. Para o ente federativa é “unha cifra realmente extraordinaria”. A Real Federación Galega de Fútbol valora de xeito moi positivo a alta inscrición de equipos, demostrando unha “gran implicación e compromiso por parte de todos: directivos, xogadores, adestradores e árbitros”.
Asemade, desde a federación consideran que estas cifras de clubs inscritos demostra tamén “a confianza nos protocolos e as moitas ganas que teñen de volver a gozar do fútbol, fútbol sala e fútbol gaélico na nosa comunidade”.
Esa implicación dos clubs tamén a solicitaron desde a RFGF ao “os Concellos facilitando o uso das instalacións co fin de que os deportistas poidan realizar a actividade deportiva que desexan, iso si, cumprindo cos protocolos sanitarios aprobados. Todos os estudos garanten que o fútbol é seguro e incluso permite colaborar no cribado coas autoridades sanitarias”, aseguran.
O fútbol é a modalidade con maior inscrición de clubs
Segundo traslada a Real Federación Galega de Fútbol, unha vez rematado o prazo de inscrición para todas as categorías dependentes da RFGF, tanto autonómicas como provinciais e locais das especialidades de fútbol, fútbol sala e fútbol gaélico xa activadas pola propia Federación, xa se coñeces o número total de equipos que decidiron participar nas competicións exprés, algunhas delas xa iniciadas nestes días.
Esas cifras son, no caso do fútbol, preto de 1.800 equipos. Unha cantidade que abrange desde a categoría da Preferente Galicia ata biberóns que formalizaron a súa inscrición para esta campaña. Na especialidade de fútbol sala competirán preto de 650 e no fútbol gaélico son nove as formacións que gozarán da súa propia liga.
Todos estes equipos formalizaron a súa inscrición a través do proceso aberto pola Federación na Intranet. En opinión da RFGF “este foi o xeito máis democrático e fiable para coñecer os equipos que voluntariamente desexaban competir esta tempada nun formato exprés. A resposta foi moi positiva e finalmente serán preto de 2.500 os equipos tanto de fútbol como de fútbol sala que comezarán a competición”.
Fútbol e fútbol sala “seguros e competicións exprés sen descensos”
A RFGF está convencida de que a práctica tanto do fútbol como do fútbol sala “é segura cumprindo todos os protocolos establecidos e neste sentido apelamos á responsabilidade e compromiso de todos e todas para respectar ao máximo os protocolos e seguir demostrando que a práctica deportiva é un espazo seguro e que tamén colabora directamente coas autoridades na detección de positivos COVID-19“.
Cabe recordar que a competición exprés desenvolverase para decidir as prazas de ascenso e non haberá descensos deportivos, aínda que si poderían darse polas causas disciplinarias establecidas no regulamento federativo.
Será unha tempada exprés de só tres meses con finalización na última fin de semana de xuño, se ben cómpre salientar que todas as previsións competicionais estarán condicionadas á situación sanitaria e ás recomendacións das autoridades.
Unhas categorías teñen test e outras máscara, por exemplo, o gaélico
En base ao protocolo aprobado pola Xunta de Galicia, as categorías autonómicas nas que resulta obrigatoria a realización de test cada 14 días son a Preferente Galicia, Primeira e Segunda División Galega Femininas e a Liga Galega Xuvenil de fútbol. Nestas categorías tamén se pode usar máscara de maneira voluntaria, pero non exime da obrigatoriedade de facer os test.
Nas demais categorías de fútbol, así como as de fútbol sala e fútbol gaélico, é obrigatorio o uso da máscara para competir.
Os sistema de competición e calendarios
Todas as categorías xa activadas pola RFGF, en concreto as galegas, xa coñecen o formato competicional e os calendarios de competición, mentres que as ligas provinciais e locais dispoñerán do devandito formato de competición e dos respectivos calendarios nestes días en reunións telemáticas que se irán celebrando por delegacións.
A competición para as categorías provinciais e locais, tanto de fútbol como de fútbol sala, arrincará a partir do 11 de abril.
A Primeira División Galega feminina xa ten data de inicio e grupos
