A fin da etapa de Carlos Cantero á fronte do Durán Maquinaria Ensino chega antes do esperado. A partir do próximo curso, o club lucense terá novo adestrador e o madrileño marchará de Lugo.
“Eu tiña un ano máis de contrato e a miña idea era continuar”, confesa o técnico, que recorda que lle sorprendeu a decisión da directiva, xa que os obxectivos estaban conseguidos. Cantero sabe que non seguirá dirixindo ás lucenses desde a vitoria ante o Araski, do 20 de marzo, cando as galegas gañaron por un 65-67.
Para o adestrador, a decisión chegou como unha sorpresa, pero considera que é algo “que hai que respetar, chégase a un acordo con eles e non hai rencor, nin enfado, nin nada”. Con todo, isto non elimina a súa sensación de tristeza, “porque sinto Lugo como a miña casa, é un lugar onde estiven moi a gusto e moi feliz”.
Carlos Cantero: “Eu tiña a idea de que ía seguir, os obxectivos estaban cumpridos”
“Eu tiña a idea de que ía seguir, os obxectivos estaban cumpridos, pero ao final chega esta chamada e hai que respetalo”, incide.
A valoración: “unha traxectoria positiva”
Nos case tres anos que formou parte do corpo técnico do Ensino, Carlos Cantero participou en dúas edicións da Copa da Raíña e nos play offs desta tempada, na que caeron derrotadas ante Valencia Basket.
O Ensino despídese da tempada loitando ante o Valencia (82-54)
Destes últimos cursos, o adestrador prefire non quedarse con momentos concretos, senón con que Lugo foi “un sitio onde estiven moi a gusto, onde puiden adestrar e crecín á par que o club. Foi unha traxectoria positiva para ambos e marcho quedándome con que foi unha etapa moi positiva na miña vida e na miña carreira”.
Carlos Cantero: “Puiden adestrar e crecín á par que o club”
O broche final
A disputa dos cuartos de play-off ante as taronjas son o broche final ao vínculo entre Cantero e Ensino e a derrota non empaña este momento. O técnico asegura que non marcha cun sabor agridoce, senón máis ben o contrario, orgulloso e satisfeito do traballo realizado.
“Amargo quedou o ano pasado, cando podíamos ter xogado o play-off e non o xogamos pola COVID“, aclara. Pola contra, no presente curso “loitamos o que puidemos, dimos as forzas ata o que aguantaron e competimos o que puidemos contra un grandísimo rival”.
Carlos Cantero: “Loitamos o que puidemos, dimos as forzas ata o que aguantaron e competimos o que puidemos contra un grandísimo rival”
Cantero insiste en que durante ambos partidos “puidemos saborear a preocupación do Valencia na cara as súas xogadoras e ao final gañaron porque fisicamente son mellores e porque é mellor equipo”. Por iso, o adestrador asegura estar “orgulloso do noso traballo, de como competimos e da regularidade que tivemos ao longo da tempada”.
O madrileño prefire escapar dunha puntuación para o plantel, xa que “podería poner nota se imos partido a partido, pero á tempada enteira non quero poñerlle unha nota nin ás xogadoras nin a min”. Na súa opinión, “fixemos o traballo o mellor que soubemos, e dimos o máximo”.
Carlos Cantero: “Fixemos o traballo o mellor que soubemos, e dimos o máximo”
O máis importante, máis aló dos resultados é que no Ensino “fumos felices e creo que fixemos felices á afección”. A sensación xeral á fin da tempada é de satisfacción, porque tanto xogadoras como corpo técnico “dimos todo o que podíamos dar e estamos contentos nese aspecto. A verdade é que marcho feliz e contento e cando marchas así é porque a nota ten que ser alta, pero non lle vou dar ningún número a ninguén”
O futuro de Cantero
O futuro de Carlos Cantero polo de agora é incerto, pero o adestrador ten claro que quere seguir vinculado ao baloncesto feminino.
“Oxalá sexa en España porque é o que máis me apetece, é o que quero. Quero seguir estando no baloncesto feminino, porque é o que me gusta. Se hai posibilidades de estar aquí en España por suposto que hai posibilidades de volver ao Pazo como rival e moi contento de reatoparme no camiño con moita xente”, remata.
