A Liga Feminina Endesa segue en marcha e o Durán Maquinaria Ensino ten unha nova oportunidade de sumar dous puntos. O partido desta vixésimo primeira xornada será ante o Casademont Zaragoza en casa. Ambos equipos citaranse este venres, 15 de xaneiro, ás 19:45 horas.
De gañar, as lucenses poderían comezar unha racha de vitorias. Pero o adestrador, Carlos Cantero, móstrase cauto e recorda que o Ensino non está nun nivel óptimo. Pero tamén é optimista: “Convertémosnos nun equipo peleón e difícil de bater. Iso é positivo e importante”, salienta.
Atendendo á clasificación e á traxectoria nas últimas xornadas destes dous conxuntos, o duelo preséntase favorable para as xogadoras dirixidas por Cantero. O Ensino, con 28 puntos, sitúase cinco postos por riba das baloncestistas do Zaragoza, que ocupan a duodécima posición con 26 puntos.
Ademais, as lucenses chegan de lograr unha vitoria ante o SPAR Gran Canaria, nun partido no que superaron un dos erros que máis as castigaban: saír desenchufadas no primeiro cuarto e xogar. Isto valeulles para sumar dous puntos moi valiosos e aumentar a confianza e unión do equipo, que segue medrando na competición.
Un rival “rabioso e necesitado”
Para esta fin de semana, as baloncestistas enfrontaranse a un Casademont Zaragoza que ven dunha racha de catro derrotas consecutivas. Hai case un mes que non coñecen a vitoria. A última foi ante o Cadi La Seu, na décimo sexta xornada.
Carlos Cantero: “(O Zaragoza) É un equipo duro, que ven rabioso coa necesidade de gañar e mostrando certa melloría no seu xogo”
Por iso, o técnico do Ensino recorda que o rival é “un equipo duro, que ven rabioso coa necesidade de gañar e mostrando certa melloría no seu xogo. É un conxunto cunha das postes máis determinantes da Liga e exteriores que, aínda que irregulares, son xogadoras moi completas no bote e tirando de longa distancia”.
Cantero subliña que o nivel que agardaban do Zaragoza é maior do que se está a ver na táboa e na pista. “Quizais sexa o equipo que todos agardábamos que estivese arriba e non é así. Sorprende, pero así se demostra o duro da Liga e o mérito de que o Ensino estea na Copa ou nun bo sétimo posto agora”.
Por iso, o adestrador non se confía e apunta a que as súas xogadoras deberán vixiar a Gatling. A baloncestista é “moi determinante no equipo, xogan moito para ela. É das mellores xogadoras ofensivas da Liga e das mellores postes”.
As rotacións das lucenses baixan tras a marcha de Nina Bogicevic
Este será o primeiro partido no que nas filas do Ensino non estea a serbia Nina Bogicevic. A escolta rescindiu o seu contrato co club galego ao ter unha oferta dunha Liga máis longa que a española, onde poderá disputar máis minutos.
Con esta baixa, as rotacións serán menores para o equipo de Cantero, o que afectará ao seu rendemento pero é un “hándicap que ao longo da tempada nos está facendo fortes e ser peleonas. Non queda outra”, reflexiona o técnico.
Carlos Cantero: “A necesidade dunha ou dúas fichaxes é innegable desde hai tempo”
De todas formas, recorda a importancia de atopar unha xogadora para substituíla. “A necesidade dunha ou dúas fichaxes é innegable desde hai tempo. A Liga e o calendario son moi esixentes. Pero repito, saber e aceptar esa dificultade estános a facer fortes e conseguir vitorias que outros non conseguen”, declara.
O resto do grupo está “máis tocado que sano, pero se adapta a semana para que poidan xogar e chegar ao partido nas mellores condicións”, asegura o adestrador. A isto engade que estas semanas de traballo están a ser “raras” e por iso é moi importante “estar a tope no plano mental e competitivo”.
Como parte positiva, Bea Sánchez volverá á pista ao ter xa a alta médica e volver aos adestramentos co equipo, “coidándoa e con paciencia para que chegue ao partido”.
O Ensino adianta a hora do partido para respectar o toque de queda
Nun principio, a FEB establecera as 20:30 horas como horario para esta vixésimo primeira xornada competitiva. Desta forma, o encontro tería rematado máis aló das 22:00 horas, novo toque de queda en Galicia, establecido desde este venres como medida para controlar a pandemia de COVID-19. Agora, tras ser aprobada a solicitude do Ensino, o partido comezará ás 19:45 horas.
⚠️CAMBIO DE HORA⚠️
El partido de mañana vs @CasademontZGZ se adelanta para no entrar en conflicto con el toque de queda en #Lugo.
▶️ Se disputará a las 19:45 ◀️#SomosEnsino #LFEndesa pic.twitter.com/0mbLcceASc
— Ensino Lugo (@EnsinoLugoCB) January 14, 2021
