A cita da última xornada era clave para o Durán Maquinaria Ensino por ser fronte a un rival directo, o Campus Promete. Pero as lucenses non cumpriron, e alonxáronse un pouco máis da loita pola Copa na Liga Femenina Endesa. Con todo, o adestrador, Carlos Cantero , asegura que “no equipo non falamos da Copa. Simplemente queremos preparar os partidos que quedan da mellor maneira posible, ir semana a semana e coa idea na cabeza de gañar cada un dos encontros”. O seguinte, contra o Alter Enersun Al-Qázeres Extremadura, o venres ás 20:45 horas.
Con cinco vitorias e sete derrotas, esta está a ser unha tempada de claros e escuros para o equipo lucense. A final da volta achégase, e o técnico entende que estes últimos partidos “sempre son complicados, competidos e xogar fóra da casa aumenta esa dificultade”.
O Ensino non se relaxa contra o penúltimo da táboa
Este será o caso da próxima cita, no campo do Al-Qázeres, un rival a priori adsequible, que de dez partidos solamente gañou dous. Pero isto non é motivo de relaxación para Cantero quen, en relación ao duelo, declara que “non nos confiamos. Esperamos realizar o noso traballo no partido e así poder gañalo”.
Carlos Cantero: “Non nos confiamos. Esperamos realizar o noso traballo no partido e así poder gañalo”
O encontro será moi distinto ante o que tiveron por diante as xogadoras do Ensino contra o Promete. Para esta cita, as lucenses deberán estar atentas a “non lles ceder tiros de tres e mellorar nós o tema do acerto”, reflexiona Cantero. Os erros fronte ao canastro foron o maior lastre das baloncestistas no último partido, algo no que deberán traballar para seguir sumando puntos.
O que non fallou foi o éxito das baloncestistas adestradas por Cantero. Aleksandra Stanacev logrou estar entre as mellores xogadoras da xornada da Liga Endesa, empatada a puntos con Taylor, do SPAR Gran Canaria, con 26 créditos de valoración. Tamén destacou no anterior encontro Vega Gimeno, elixida MVP pola afección do Ensino, tras anotar 14 puntos e lograr 5 rebotes.
Así, o técnico prepara as súas xogadoras para a viaxe a Cáceres. Contará con todas elas, aínda que as que tiveron compromisos internacionais coas as súas seleccións no parón seguen un pouco cargadas. Pola súa banda, Bea aínda “chega moi xusta ao partido, aínda non cumpriu o 100% do prazo de recuperación, pero viaxará co equipo”, explicou Cantero.
Nina Bogicevic reencontrase co Al-Qázeres
Quen si xogará previsiblemente é a nova incorporación, Nina Bogicevic, exxogadora do Al-Qázeres. A escolta serbia uniuse ao Ensino a semana pasada e está incorporándose ao grupo. “Nina estase a adaptar ben. Pouco a pouco vai sumando sesións de adestramento, coñecendo ás compañeiras e o xogo que estamos realizando e os conceptos defensivos. Son moitas cousas en pouco tempo, polo que hai que ser paciente. Pouco a pouco se irá adaptando da mellor maneira posible ao equipo e aos partidos que veñan”, sinalou o adestrador.
Nina e as súas compañeiras terán na décimoterceira xornada a oportunidade de sumar outros dous puntos contra o penúltimo da clasificación, para poder así escalar na táboa. O rival ven dun parón de dous partidos adiados ao non poder disputar o encontro contra o Bembibre e o SPAR Girona. Desta forma, recibirá ao Ensino en casa o venres ás 20:45 horas, con ganas dunha vitoria tras perder contra o segundo, o Valencia, na décima xornada. O partido poderá seguirse en directo no Canal FEB.
Partido de la XIII jornada de la #LFEndesa
Viernes 27 a las 20:45, en directo por Canal Feb.Viajamos hasta Cáceres para medirnos al Alter Enersun @CBALQAZERES.#SomosEnsino | #VoltaráLoita pic.twitter.com/0pZOCDzKkC
— Ensino Lugo (@EnsinoLugoCB) November 25, 2020