O parón na Liga Feminina Endesa estalle a pasar factura ao Durán Maquinaria Ensino, que non coñece a vitoria desde que se retomou a competición. As lucenses de Carlos Cantero levan dúas derrotas consecutivas, a última delas ante o SPAR Girona.
“Perdemos unha esencia nestas semanas que temos que recuperar e volver a ser as que eramos nos últimos partidos antes do break“, sinala o técnico lucense, Carlos Cantero.
O duelo, ante un rival clasificado para a Euroliga e que ocupa a segunda posición, presentábase como complicado. Por este motivo, o obxectivo lucense nesta xornada era “mellorar a nosa actitude e o noso xogo respecto ao partido anterior contra Bembibre“, recordaba o técnico.
Así, malia a derrota, Cantero ve a parte positiva deste encontro e destaca os minutos iniciais e finais do seu plantel. No inicio do enfrontamento, o adestrador quedou contento co rendemento das súas pupilas, aínda que sinala que se cometeron fallos en defensa que non se corrixiron ao longo do partido.
Carlos Cantero: “Elas foron superiores a nivel individual e nos emparellamentos”
O Ensino foi perdendo fol a medida que pasaban os minutos, principalmente polo plantexamento rival. “Elas foron superiores a nivel individual e nos emparellamentos e no xogo un contra un podían correr máis porque non seleccionabamos ben os tiros ou tirabamos moi pronto ou rompíamos os sistemas”, analiza o técnico.
O escenario cambiou de novo nos quince minutos finais, cando a concentración volveu ao club lucense e obrigaron ás catalás a pedir tempos mortos para reorganizarse.
Carlos Cantero: “Estou enfadado pola derrota, pero satisfeito a modo global polo partido”
En resumo, Cantero quedou “enfadado pola derrota, pero satisfeito a modo global polo partido, pero aínda hai que seguir traballando”.
Helena Oma adáptase ao xogo do Ensino de Cantero
Este foi un encontro especial para Helena Oma. A alero enfrontábase ao seu exequipo no seu segundo partido coa camisola do Ensino.
Helena Oma: “Todo ten o seu tempo de adaptación, pero creo que vou polo bo camiño”
“Fíxoseme un pouco raro, pero por un momento pensei: Isto parece coma se estivesemos nun adestramento como antes”, recordaba en rolda de prensa.
Malia levar pouco tempo no club galego, a xogadora expresa a súa comodidade nas filas do Ensino e admite que “aínda queda moito pola miña parte, pero pouco a pouco atópome no xogo do equipo e vou estando máis cómoda á hora de xogar con elas. Obviamente todo ten o seu tempo de adaptación, pero creo que vou polo bo camiño”. A isto engade que en todo momento sentiuse “moi apoiada e ben recibida”.
Helena Oma: “Elas (polo SPAR Girona) teñen un nivel de dureza e intensidade alto”
Oma coñece ben ao seu anterior club, un equipo que destaca polo seu “nivel de dureza e intensidade alto”, o que fixo que o duelo fose “moi físico”. Segundo a catalá, o Ensino tivo problemas para manter ese ritmo, e “eses altibaixos e os momentos nos que non estivemos penalizáronnos cos tiros exteriores ou segundas oportunidades”.
Segundo a baloncestista, a explicación da derrota das lucenses está nesa irregularidade e no non “estar concentradas ao 100% durante os corenta minutos”. Oma sinala como cruzais algunhas perdas de balón que sufriron e que impediron unha boa dinámica no cadro galego.
Helena Oma: “Era un partido moi complicado que a priori todo o mundo da por perdido, pero nos levamos boas sensacións nalgúns aspectos”
“Sabíamos que era un partido moi complicado que a priori todo o mundo da por perdido, pero nos levamos boas sensacións nalgúns aspectos. De cara ao seguinte partido temos que mellorar os pequenos detalles que nos faltaron e seguir facendo as cousas ben”, conclúe a alero.
