O Durán Maquinaria Ensino está nun dos seus mellores momentos da tempada. Dúas vitorias seguidas, a última delas cun gran xogo, levantan os ánimos das xogadoras de Carlos Cantero. Con estas boas sensacións chegan ao partido deste domingo, 24 de xaneiro, ás 19:00 contra o Ciudad de La Laguna Tenerife (CB Clarinos).
“O equipo mentalmente está bastante positivo e concentrado no que estamos traballando e en gañar os partidos”, declara o técnico galego. Algo moi importante, para afrontar este duelo ante un rival directo, nun encontro que Cantero prevé como “difícil, xa o foi na ida”.
Na primeira volta, este enfrontamento escapóuselles ás lucenses cun resultado final de 60-73. Entón, os problemas na intensidade das galegas no primeiro cuarto custáronlle a derrota. “Aquí penalizounos o primeiro cuarto, no que saímos frouxas, aínda que os tres seguintes estiveron moi igualados”, recorda o técnico.
Agora, o Clarinos leva un punto máis que as lucenses, con 11 vitorias e 10 derrotas, á inversa que o Ensino. Este partido servirá para medir as forzas de dous conxuntos moi igualados, e as galegas deberán vencer a un “equipo moi físico, que xoga a poucas cousas e bastante simples, pero aproveitando o talento ofensivo das súas xogadoras estranxeiras sobre todo”.
O plan do Ensino para vencer ao Clarinos
Para esta nova oportunidade, o Ensino intentará sacar proveito do seu desgaste por vir de xogar a competición europea. O Clarinos xoga no grupo F da EuroCup contra as francesas de La Roche Vendée.
Carlos Cantero: “É un equipo moi físico e se algún pode soportar esa carga de partidos é o Clarinos”
“Intentaremos que sexa unha das claves para que non se metan no partido, que acusen ese cansancio, mental sobre todo”, sinala Cantero. Pero o adestrador advirte ás súas xogadoras que non se poden confiar: “É un equipo moi físico e se algún pode soportar esa carga de partidos é o Clarinos“, declara.
Por iso, “sería perigoso se nos fiamos de que cheguen cansas”. O Ensino deberá adaptarse ao rendemento na pista do rival e plantexa xa varias opcións de xogo. “Se é así, o aproveitaremos, e se non, utilizaremos outro plan. Temos un plan A, un B e un C”, asegura o técnico lucense.
Carlos Cantero: “Partimos por seguir co que estamos facendo, cunha saída forte ao partido e non deixar que se concentren”
Pero o principal, pasa porque as galegas xoguen ao que saben. “Partimos por seguir co que estamos facendo, cunha saída forte ao partido e non deixar que se concentren. Levar nós a iniciativa e cuarto a cuarto ir gañando o partido”, puntualiza Carlos Cantero.
Reto físico para as galegas
En principio, para esta nova xornada, o Ensino non lamenta baixas. De todas formas, Vega Gimeno, que xa se perdeu o anterior encontro, segue entre algodóns. “Parece que para este vai poder estar, aínda que imos vendo no día a día como se encontra e que sensacions ten”, informa o seu adestrador.
Carlos Cantero (sobre Gimeno): “Parece que para este vai poder estar, aínda que imos vendo no día a día como se encontra e que sensacions ten”
Outra dúbida é Laura Aliaga, que “parece que se recupera das escordaduras que tivo nos últimos partidos”. O resto do plantel que estivo con molestias “está adestrando, rotando un pouco máis nos adestramentos, ás veces coas júniors. Todo vai segundo o previsto para que xoguen con normalidade”, asegura Cantero.
Estas son semanas duras fisicamente para o Ensino, e o equipo é consciente de que “hai que apretar un pouco o freo e ir recuperando o mellor posible ás xogadoras, para que cheguen ao partido nas mellores condicións e que logo poidan xogar o partido coa máxima normalidade”, explica o adestrador.
O domingo, as baloncestistas intentarán arrastrar o bo xogo que realizaron a semana pasada, o que lles valeu para sumar unha vitoria moi valiosa para escalar postos na Liga Feminina Endesa.
Carlos Cantero: “Foi un partidazo. Quizá o mellor desde que estou aquí”
