Este venres pode ser a despedida da tempada do Durán Maquinaria Ensino. As xogadoras de Carlos Cantero disputan ante o Valencia Basket a volta de cuartos de final da fase polo título despois dun illamento e ante un conxunto vencedor da Euro Cup.
“Mentres elas estaban xogando unha final, nós estabamos na casa”, recalca o adestrador do cadro lucense. Un caso positivo en COVID-19 no Ensino a principios de mes obrigou a adiar o encontro e ao plantel a pasar unha corentena de 10 días.
Este illamento desestabilizou por completo ao equipo galego. “Matounos fisicamente”, incide Cantero. Pasar case dúas semanas lonxe das pistas supón “perder físico, da igual o que fagas en casa, porque non vale de nada a estas alturas, perdeuse toque de balón, plano táctico, concentración, nivel competitivo”.
Para o adestrador do conxunto de Lugo, “a falta dun partido onde nos xogamos o play off, que pase isto é ridículo, roza o vergoñento, porque non sei a que estivemos xogando estes sete meses, se agora pasa isto”. Cantero apunta que hai protocolos da Liga para estas situacións e que ao verse obrigadas a relaizar adestramentos telemáticos, “pérdese este nivel”.
O adestrador prefire recordar o partido de ida
O técnico móstrase moi pesismista cara este partido de volta, no que as xogadoras do Ensino terían que vencer de máis de 11 puntos para pasar de fase.
Por iso, Cantero prefire recordar o gran partido de ida, no que as galegas loitaron polo encontro e realizaron unha boa actuación malia a derrota. “Creo que nós fixemos o noso traballo na ida, o fixemos moi ben, fixemos o noso traballo e deixamos a eliminatoria aberta e a partir de aí foron todos pedras no camiño, desde o illamento, a maneira na que imos viaxar, cansadas…”
O adestrador móstrase pesimista e declara que “as posibilidades de gañar de 12 puntos a día de hoxe con todo o que pasou son mínimas e esa é a realidade. Creo que o traballo o fixemos foi moi ben na ida, o deixamos aberto, pero isto xa é un risco máis de lesións e un risco innecesario”
Carlos Cantero: “As posibilidades de gañar de 12 puntos a día de hoxe con todo o que pasou son mínimas e esa é a realidade”
Preguntado por se algunha canteirana acudirá á cita, o adestrador apunta que non será así, por xogar como visitantes. “Teríasido así se houbera partido en casa, como despedida da tempada, pero ao ser fóra, son as características do play off, que te atopas este tipo de cousas. Pero nada, hai que ser realistas e quedarse co partido de ida como punto final da tempada”.
O Ensino plántalle cara ao Valencia Basket pero non evita a derrota (58-69)
O Ensino ten poucas posiblidades de gañar ao Valencia
O adestrador do club lucense explica que a sensación que se vive no vestiario é que este partido ante as taronjas é xa “un mero trámite. Sendo realistas é así”.
A posibilidade de remontada vése lonxe para as baloncestistas do Ensino, debido ao estado de cada un dos planteis: “As mínimas posibilidades que tiñamos de gañar ou facelo de 12 puntos eran poucas e con isto, ante o rival xogándose o play off como nós, vindo de xogar unha final e gañala, a nivel mental e físico elas están non nun estado superior, senón en 10 escalóns superiores”.
Carlos Cantero: “A nivel mental e físico elas están non nun estado superior, senón en 10 escalóns superiores”
Cantero recorda que é moito máis fácil perder a forma física e mental que gañala, polo que “estar dez días paradas, ou facendo cousas en casa que non valen para moito, non nos deixa moitas posibilidades”. Nas súas palabras, isto é “algo difícil de xestionar na cabeza das xogadoras, da xente do club e de todos. Quizais están pensando xa máis na tempada que vén que neste partido”.
Raquel Carrera é a MVP da final da Euro Cup para Cantero
Ás dificultades propias que sufre o Ensino, hai que sumar que o seu rival é un imparable Valencia que ademais da estupenda tempada en LF Endesa ven de levantar o seu primeiro título europeo na final da Euro Cup. Sobre este duelo tamén se pronunciou Cantero, que alabou o nivel das laranxas: “Fixeron o que tiñan que facer, eran favoritas e gañaron. Quizais o único rival da Euro Cup que lles podía plantar cara era o Venezia e foi unha final estupenda, moi bonita”.
Nela, unha peza clave foi a galega de 19 anos Raquel Carrera, a MVP da final para o adestrador do Ensino. Segundo a súa valoración, a ourensá é “unha xogadora top española, unha xogadora top galega e para min que debería estar nun equipo top galego. Non é así. É unha xogadora que vai facer cousas moi grandes”. A súa actuación no partido ante o Venezia e os tiros libres que lles deron a vitoria foron, para Cantero, “a confirmación da súa carreira”.
A galega Raquel Carrera, clave na vitoria do Valencia como campión da Euro Cup
