“Foi un partidazo. Quizá o mellor desde que estou aquí, que eu vira coa satisfacción de como xogou o equipo en ataque, como xogou en defensa, da súa intensidade ante o rival, que era complicado”, declaraba o adestrador do Durán Maquinaria Ensino, Carlos Cantero.
A vitoria lograda ante o Casademont Zaragoza, cun abultado 88-55, deixaba ao banco do Ensino pletórico tanto polas accións individuais como polo xogo do equipo como conxunto.
O técnico lucense destacou como o cadro galego logrou superar un dos seus hándicaps que máis afectou en partidos pasados: un mal inicio de partido. Ante as zaragozanas, as xogadoras do Ensino saíron enchufadas desde o minuto 1. En palabras de Cantero, “estivemos moi serias, saímos moi ben no primeiro cuarto, que é algo que tiñamos pendente, algo que estamos traballando e que tiñamos falado”.
Carlos Cantero: “Estivemos moi serias, saímos moi ben no primeiro cuarto, que é algo que tiñamos pendente”
Tamén destacou o traballo das súas pupilas na defensa a Gatlin e Wurz, dúas das xogadoras máis completas do equipo rival. Ambas lograron sumar 23 puntos entre as dúas, case igualando á lucense Stanacev, MVP do partido para a FEB e a afección.
A serbia do Ensino ven ademais de ser nomeada mellor xogadora da xornada. Con 33 puntos valorativos, Stanacev foi a máxima anotadora do duelo, con seis triples de seis tirados. Un acerto impecable desde a liña de tres, que axudou a que o equipo de Cantero dominase na pista.
O regreso de Bea Sánchez ao Ensino de Cantero
Nas filas locais, non puido estar Vega Gimeno quen, xa con molestias nos adestramentos, non participo no xogo do Ensino. Quen si volveu tras un período de baixa por lesión foi Bea Sánchez.
A baloncestista móstrabase tamén moi contenta coa súa volta, co resultado e coa participación de varias juniors no partido. “Hoxe destaco todo”, declaraba en rolda de prensa. Un bo partido en todos os aspectos do xogo galego, con todo o plantel aportando, o que crea “esa piña que necesitabamos en casa”. Nun Pazo dos Deportes de Lugo no que as lucenses víronse arropadas pola afección, “que coma sempre están a tope”.
Bea Sánchez: “Para min, ademais do resultado (o debut das junior) é a maior das felicidades”
Sánchez recoñece que sabía que entraría no partido “de menos a máis”, e asegura estar encantada co transcurso do encontro “pero sobre todo tamén de poder ver ás junior en pista, que elas sempre veñen axudar aos adestramentos. Para nós, ou polo menos para min, ademais do resultado é a maior das felicidades”.
Este foi o primeiro duelo para Paula Hoyuelos, que xogou un minuto e anotou dous puntos, e para Yashina Lebron, que disputou catro minutos de partido.
Así, malia ser o seu reencontro coa pista, a 28 do Ensino insiste en recoñecer o xogo de todo o equipo. “Cando estás moi ben atrás, en ataque nos sentimos moi fluídas e moi cómodas. Con aportación de todo o mundo, e iso sempre se desfruta nun partido”, recalca.
Na análise do xogo, Bea Sánchez coincide co seu adestrador en destacar o inicio do partido. “Creo que fixemos ben algo que nos custa últimamente facer e é que saímos moi intensas en defensa, facendo todo o que tiñamos que facer moi ben. Creo que non lle deixamos ningunha opción a elas”, reflexionaba.
Carlos Cantero: “Agora a recuperar a Gimeno que pronto estará co equipo, porque tampouco é grave o que ten”
“Recuperamos a unha xogadora, e agora a recuperar a Gimeno que pronto estará co equipo, porque tampouco é grave o que ten. Así que para arriba, polo de agora”, resumía Cantero.
