Coa vista xa posta nos play-offs polo título, o Durán Maquinaria Ensino de Cantero afronta o último partido da competición regular en casa e ante o colista. As lucenses recibirán este sábado, 27 de marzo, ás 19:00 horas ao Quesos El Pastor.
Nun principio, este é un partido sen alicientes tendo as galegas conseguido o posto na segunda fase e as zamoranas confirmado o seu descenso de categoría. Nin locais nin visitantes se xogan nada.
Por este motivo, o adestrador das lucenses, Carlos Cantero, admite que en Lugo se pensa xa na segunda parte da competición e agarda que este partido “sirva como preparación” e que o Ensino “dea boas sensacións cara partidos posteriores”.
Así ve Cantero o último partido de Liga
Nesta liña, o técnico prepara o encontro ante o Quesos El Pastor como un ensaio de conceptos que sirvan para os play offs.
Do rival, Cantero agarda a un conxunto “profesional”, pero que non se xoga nada, polo que considera que as baloncestistas “darán unha boa imaxe e punto”. A nivel individual destaca á escolta-alero Victoria Vivians, quen ven dunha lesión pero “ten unha man de tres e unha capacidade ofensiva moi alta”.
Ao non loitar xa o Ensino (sétimas, 43 puntos) polo play off nin o Quesos El Pastor (décimosextas, 32 puntos) por evitar o descenso, este será un partido sen presión en ambos bandos.
Equipo tocado
Por parte das lucenses, o maior hándicap estará no estado físico das xogadoras. “Son máis rápido se digo as que están ben”, resumía Cantero en rolda de prensa. A falta dunha xornada para iniciar o play off, só Helena Oma e Alba Prieto están ao 100% nas filas do Ensino.
Á lesión de Merritt Hempe, que a mantén alonxada das pistas, e aínda non é quen de completar adestramentos con contacto e non estará esta fin de semana no Pazo, engádense varias compañeiras tocadas. Destaca tamén Natalie Van den Adel, que aínda está a recuperarse da COVID-19 e compite con complicacións, e Laura Aliaga, protagonista dun duro golpe no partido ante o Valencia, do cal está a recuperarse. Porén, a doce do Ensino é un óso duro de roer e previsiblemente estará preparada para competir sen problemas este sábado.
Na lista de xogadoras entre algodóns tamén están nomes como Stanacev o Gimeno, nun equipo no que as lesións de nocellos e xeonllos están a ser moi comúns.
Como se explica a orixe das lesións nunha tempada marcada pola pandemia?
Cantero afronta este duro reto de baixas rotacións e xogadoras tocadas semana a semana, dando prioridade sempre a que estean preparadas para disputar os partidos. “Aí está a milagre do que estamos conseguindo. Gañamos a equipos como La Seu ou Araski con estes impedimentos. Aí está o éxito de conseguir o que estamos a conseguir”, subliña.
Carlos Cantero: “Aí está a milagre do que estamos conseguindo. Gañamos a equipos como La Seu ou Araski con estes impedimentos”
A clave está na dosificación de xogadoras, que cada vez comparten máis os minutos. No último encontro, ante o Valencia, ningunha das galegas superou os 30 minutos, nin sequera xogadoras como Stanacev, que adoitan a disputar a maior parte dos encontros. “É prioritario chegar fisicamente ben aos play offs que gañar partidos porque xogadoras xoguen 10 15 minutos máis”, reflexiona o adestrador.
Mensaxe á afección
Este será o último encontro da competición regular no Pazo dos Deportes, no que poderá estar presente parte da afección. Unha parte moi importante da dinámica de calquera equipo, e non é menos no Ensino.
“Notouse esa forza cando xogas en casa, que a da o público. Bótaselles en falta e quero aproveitar isto para agradecer todo o apoio que está recibindo o equipo e eu como adestrador polo xogo que estamos desenvolvendo, os resultados, e que sentían moito non estar no pavillón pero nos seguían desde casa. En certo modo esa forza si que chegou”, asegura Cantero.
Carlos Cantero: “Quero aproveitar isto para agradecer todo o apoio que está recibindo o equipo e eu como adestrador polo xogo que estamos desenvolvendo, os resultados”
Unha mensaxe para a afección que o adestrador xa enviou hai uns días no seu Twitter, subliñando a falta que fai o apoio das siareiras nas bancadas.
Quiero dar las GRACIAS por todos los mensajes de felicitación y apoyo por la temporada realizada, por el juego y resultados… Mensajes de amigos, desconocidos, rivales, aficionados, exjugadoras… Muchos respondidos de forma privada, pero os aseguro que apreciamos… (Sigo…)
— carlos cantero (@carloscantero_9) March 23, 2021
Para aquelas persoas que tamén queiran apoiar ao Ensino, pero teñan que facelo desde a distancia, o Canal FEB retransmitirá en directo vía streaming o encontro ante o Quesos El Pastor.
